Inbiakna neih tur ṭhulh vangin Pakistan lawm lo

External Affairs Minister Sushma Swaraj-i leh Pakistan foreign minister Shah Mehmood Qureshi-ten New York-a UN General Assembly karlaka meeting an neih tur chu India in a ṭhulh a, hei vang hian Pakistan lam an lungawi lo hle.

Meeting neih tur ṭhulh a nih chhan hi India intellingence agency-ten Pakistan intelligency agency ISI thuthawn an man fuha an thu hmuh vang nia sawi a ni. Report chuan intelligence agency-ten information an dawnah hian ISI-ten firfiakte hnena Jammu and Kashmir-a SPO-te an rukbo hnua that tura an hriattirna niin a tarlang.

ISI thu thawnah hian SPO an man tur leh thah turte hming pawh an tarlang tel vek nia sawi a ni. Firfiakten SPO pathum an thahte chu Nisar Ahmad, Firdous Ahmed leh Kulwant Singh te an ni.

Pakistan chu India-in inbiakna neih tur a ṭhulh chungchangah a lungawi lo hle a, Pakistan foreign minister Qureshi chuan India ram chhung buaina vangin India hian hetiang thil hi a ti niin a sawi. India sorkar thiltih dan chu thil awm lo tak a ni, tiin a sawi.