Feb 11 thleng political road show leh rally neih khap chhunzawm

Election Commmission chuan nimin khan assembly inthlan neihna tur, state panga-ah roadshow, Pad-yatras, cycle/bike/vehicle rally leh punkhawm khapna a siam chu February 11 thleng a pawtsei.

Hetihlai hian, poll body chuan meeting leh election campaign chungchanga mipui kalkhawm thei zata khuahkhirhna an siam erawh a thlahdul thung.

Political party emaw, candidate-ten emaw pawn lama public meeting an neiha tel thei zat chu mi 500 aṭangin 1,000 chungah phalsak an ni. Hei bakah hian door-to-door campaign neihnaa kal phalsak zat pawh 10 aṭangin 20-ah a tipung bawk a, hei hian security mi leh sate a huam tel lo ang. Election body chuan indoor meeting naah khuahkhirhna pawh a thlahdul a. Kalkhawm thei zat mi 300 ni ṭhin chu mi 500 emaw hall chhunga leng zat aṭanga 50% emaw a phalsak bawk.

EC hian state pangaa health leh electoral official-te hmuin, state chhunga Covid-19 hri leng dinhmunte pawh an thlir pui a ni.

"State chief secretary zawng zawngte chuan Covid-19 hri kai dan report kimchang, hri kai an pung nge an tlahniam mek tih Commission hnenah an hrilh tur a ni. Positivity rate pawhin tlakhniam lam pan mekin, damdawi-ina dahluh ngai pawhin zuih lam a pan zel a ni," tiin EC chuan a sawi a, state officer-te chuan Covid inkaihhruaina chu kenkawh zel an duh thu an thlen bawk.

Chief Election Commissioner Sushil Chandra chuan inthlahdul a nih rualin, hri leng mek dinhmun thlirin thupekte uluk taka kenkawh zel a pawimawh thu a sawi.