Goa minister pahnih ban

Goa Chief Minsiter Manohar Parrikar-a cabinet chu nimin khan siksawi a ni a, minister pahnih ban an ni.

Chief Minister's Office-in a tarlan danin, minister pahnih Francis D'Souza leh Pandurang Madkaikar te chu bang tura hriattir an ni a, hetihlai hian Nilesh Cabral leh Milind Naik te chu cabinet minister atan lakluh an ni dawn thung.

BJP president Amit Shah chuan Pathiani khan state cabinet siksawi a nih tur thu hi a lo sawi tawh a, hetihlai hian damloh avanga enkawl mek CM Parrikar thlak a ni dawn tia sawi erawh chu thu dik lo niin a sawi thung. Minister aṭanga ban pahnihte pawh hi hun eng emaw chen dam lohna avanga damdawi-ina enkawl mek an ni bawk.

Parrikar hi New Delhi-a All India Institute of Medical Sciences (AIIMS)-ah pancreatic vangin enkawl mek a ni a, hun eng emaw chen damlohna avanga hna thawk mumal loa a awm tawh avangin Congress party chuan Assembly-ah sorkar fiah an phut bawk a ni.

Congress Party chuan Parrikar hian Rafale deal chungchanga thil pawimawh tak tak hriat a neih avangin hei hi blackmail-na atana hman hlauin Prime Minister Narendra Modi leh Amit Shah te hian an ban ngam lo niin an sawi.

MLA 40 awmna Goa Legislative Assembly-ah hian Parrikar-a kaihhruai sorkar hian thlawptu MLA 23 a nei mek a ni. BJP hian MLA 14 neiin a thawhpui party dangte nen sorkar hi an siam a, hetihlai hian Congress chu party mala MLA ngah ber niin MLA 16 a nei thung.