SC-in criminal case neilai MP, MLA-te disqualify dawn lo ; MP leh MLA-te law practice chhunzawm phalsak

Supreme Court chuan MP leh MLA ṭanglai, criminal case nei laite disqualify tura ngenna chu a hnawl a, hetiang pawikhawihtuten roreltu dinhmun an chelh theih lohna turin Parliament chuan dan a siam a ngai a ni, a ti.

Court-ah hian roreltu, MP leh MLA zinga court-in criminal case a siam sakte chu an nihna aṭanga ban tura ngenna petition eng emaw zat thehluh a ni. Nimin khan heng petition-te hi Chief Justice Dipak Misra kaihhruai judge panga awmna constitution bench chuan a ngaihtuah a ni.

Court chuan candidate-te chuan inthlan an chuh hmain elction commission hnenah thubuai an neih leh neih loh chungchangte chiang takin an hriattir tur a ni, a ti. Candidate te chanchin kimchang hi inthlan chuh tuma nomination an thehluh hmain mipuite hmuh theih turin vawi thum tihchhuah ni se, heta aṭang hian mipuite chuan an mi thlan turte chu an hrechiang thei dawn a ni, a ti.

Dan hman mek hnuaiah politician, an thubuaia thiam loh chantirte chu kum ruk chhung atan inthlana an chuh khapsak an ni. Mahse thubuai nei lai ringawt ten politics an khelh khapna erawh a awm lo. Hei bakah hian thiam loh chantir an ni chung pawhin political party hruaitu an ni chhunzawm zel thei bawk. Hei vang hian Supreme Court-ah hian politician-te tana khuahkhirhna hi siam tura ngenna eng emaw zat a lut a ni.

Kumin March thlaa sorkar laipuiin Supreme Court-a affidavit a thehluhah, MP leh MLA nilai 1,765 zinga hmun thuma ṭhena hmun khat chuang chu criminal case nei lai an ni tih tarlan a ni.

Nimin vek khan Supreme Court chuan MP Leh MP zinga lawyer, advocate hna an thawh chhunzawm khapsak tura ngenna chu a hnawl bawk a, Bar Council of India-in a khapsak lo tih a sawi. BJP hruaitu leh advocate Ashwini Upadhyaya PIL thehluha MP, MLA leh MLC-ten legislature member an nih laia court-ah an practice khapsak tura ngenna chu a ngaihtuah a ni. PIL thehluhah hian public servant-ten advocate anga an practice theih loh laiin, legislator-te chuan court hrang hrangah an la practice chhunzawm a, hei hi Constitution Article 14 palzutna niin a tarlang.