SC-in Aadhaar chungchanga thutlukna tichhuak
Supreme Court chuan nimin khan sorkar laipui flagship Aadhaar scheme chungchanga petition thehluhte ngaihtuahin, thutlukna a tichhuak.
Chief Jutice Dipak Misra kaihhruai judge panga awmna Constitution Bench chuan Aadhaar scheme-in right to privacy a palzut tia petition thehluh hrang hrangte a ngaihtuah. Aadhaar khin letna petition thehluh hi 31 zet a awm a ni. Court chuan Aadhaar hi thil danglam bik leh him tawk a ni tih a sawi rualin, service zawng zawngah hman ngei ngei erawh a ngai lo tih a sawi.
Court chuan Aadhaar Act chu Money Bill anga pass theih a ni tih a sawi bawk. Unique Identity Authority of India (UIDAI) in data a lakkhawmte chu a tlem thei ang a ni tur a ni, a ti. Sorkar laipui hnenah security ṭha zawk pe tur leh, data dahṭhat theih hun chhung titawi turin a ti bawk.
Supreme Court chuan Aadhaar metadata te chu thla ruk aia rei dahṭhat tur a ni lo, a ti. Aadhaar Act chuan heng data-te hi kum nga thleng dahṭhat a lo phalsak tawh a ni.
Aadhaar chungchanga court thutlukna siamte chu -
• Bank account leh mobile phone nena Aadhaar thlunzawm kher a ngai lo.
• Bank account hawnna atan, mobile phone connection tihna atan leh, SIM card thar lakna atan Aadhaar telh kher a ngai lo.
• Financial service PPF, NSC atan Aadhaar a ngai lo.
• School admission tihna atan Aadhaar telh kher a ngai lo. CBSE, UGC leh NEET ah pawh Aadhaar telh kher a ngai lo. Aadhaar neih loh vangin school-a social scheme kalpuinaah zirlaite tumah hnar an ni tur a ni lo.
• Mobile company ten Aadhaar detail an phut thei lo ang.
• Private company ten Aadhaar data an dil thei lo.
Hetihlai hian hengahte hian Aadhaar a ngai dawn thung -
• Permanent Account Number (PAN). nena thlunzawm ngei ngei tur.
• Incom tax pekna atan Aadhaar telh a ngai
• Sorkar welfare service hnuaia hamṭhatna dawng turin Aadhaar neih a ngai.
PAN leh Aadhaar thlunzawm, link tawh hi vaibelchhe 21.08 a awm tawh niin data tihchhuah thar ber chuan a tarlang a, hetihlai hian PAN pekchhuah tawh hi vaibelchhe 41.02 a awm thung. PAN-Aadhaar thlunzawm hun hi nakkum March 31 thleng pawhsei a ni tawh bawk. PAN pekchhuah tawh zinga vaibelchhe 40.01 hi mimal hminga pek nin, a bak chu company leh caterogy dang hnuaiah pek a ni tih official chuan a sawi.