CJI atana Justice Gogoi ruatna khing

Chief Justice of India atan Justice Ranjan Gogoi ruat a nih chungchang khinna petition chu Supreme Court-ah thehluh a ni a, mahse nimin khan court chuan he petition hi a hnawl.

Petition hi advocate RP Luthra leh lawyer dang pakhat thehluh a ni a, October 3 aṭanga Chief Justice of India dinhmun chelh tura Justice Gogoi ruat a nihna chu sut turin an phut a ni. Petition an thehluhah Luthra chuan kumin January 12-a senior judge pali- Jutice Chemalmeswar, Ranjan Gogoi, Madan B Lokur leh Kurian Joseph-ten press conference an neihah an thu sawi behchhanin rorelna dik taka kalpui tura an duh thu an sawi. Senior judge pali-te chetdan chu judicial system palzutna a ni tiin, court chhunglama inhriatthiam tawk lohna awmte hmangin ram mipuite thinurna chawh tho sak an tum a ni, an ti. CJI Dipak Misra kaihhruai bench chuan chief justice ruat chungchangah an inrawlh tur nia a ngaih loh thu sawiin petition hi a hnawl a ni.

President Ram Nath Kovind chuan September 3 khan Chief Justice of India 46-na atan Justice Gogoi hi a ruat a, CJI nilai Dipak Misra a chawlh hunah October 3 ah lakluh a ni ang. Justice Gogoi hi Assam bakah hmarchhak bial aṭanga CJI ni thei hmasa ber tur a ni.