Russia aiin India-ah Covid-19 kai tam tawh Hri kai enkawl dam 60.85% tling

India ramah Covid-19 hripui leng kai nasa takin an pun belh zel a, tunah chuan hri kai tam lamah Russia khum tawhin hri kai tam ram pathumna a ni tawh. 

Ministry of Health and Family Welfare chuan nimina report an tihchhuahah darkar 24 chhungin hri kai hmuh chhuah thar 24,248 an awm tih an tarlang a, hemi vang hian India ramah hri kai 6,97,413 an awm tawh a ni. Hetihlai hian Russia ramah chuan hri kai 6,87,862 an awm tawh thung.

Enkawl dam lamah pawh nasa takin hmasawnna a awm ve bawk a, darkar 24 chhungin mi 15,350 lai dama puan an ni a, hri kai enkawl dam 4,24,433 an awm tawh a ni. Enkawl dam rate hi  60.85% a tling tawh a, nitinin hmasawnna a awm ve zel bawk. 

Nimin thleng khan ram pumah hri kai 2,53,287 lai chu an la awm tho a, mi 425-in an thihpui leh avangin Covid-19 vanga thi India ramah 19,693 an awm tawh a ni.

Indian Council of Medical Research (ICMR) chuan nimina report an tih­chhuahah darkar 24 chhungin Covid-19 sample 1,80,596 an test tih sawiin hri len ṭan tirh aṭanga nimin thleng khan sample 99,69,662 an test tawh a, vaibelchhia an test tling teuh tawh hle.

ICMR hian ramchhung hmun hrang hrangah sample test-na tura laboratory pawmpui 1105 an nei tawh a, chung zinga 788 chu sorkar laboratory niin 317 chu private laboratory a ni thung.

Rampum huapa hri kai dam leh tawh, recovery rate chu 60.85%  a ni tawh a, hetih lai hian ram pum huap rate aia sang state 21 an awm. 

State/UT hrang hrang zingah Chandigarh chu recovery rate sang ber niin hri kai enkawl dam rate hi 85.9% a tling pha a, Ladakh-in dawtin 82.2% a ni a, Uttarakhand recovery rate chu 80.9% a tling bawk. Recovery rate sanna state/UT dangte chu - Chhattisgarh, Rajasthan, Mizoram, Tripura, Madhya Pradesh, Jharkhand, Bihar, Haryana, Gujarat, Punjab, Delhi, Meghalaya, Odisha, Uttar Pradesh, Himachal Pradesh, West Bengal, Assam leh Jammu and Kashmir-te an ni. 

Hripui leng vanga India-in a ram mite hruai haw hna beihpui a thlak Vande Bharat Mission hnuaiah July 11 aṭanga 19 inkar hian US leh India inkarah Air India chuan thlawhtheihna vawi 36 a thlawh tir dawn. 

Vande Bharat Mission thawh lina kalpui turah Air India thlawhtheihnate chu ṭum 170 an thlawk dawn a, Canada, US, UK, Kenya, Sri Lanka, Philippines, Kyrgyzstan, Saudi Arabia, Bangladesh, Thailand, South Africa, Russia, Australia, Myanmar, Japan, Ukraine, leh Vietnam-a India mi awmte an hruai haw dawn a ni.

Hrileng vanga thla hnih chhung domestic passenger flight tihtawp a nih hnuah May 25 aṭang khan thlawh chhunzawm tir leh a ni a, international flight erawh an la thlawhtir leh lo. Directorate General of Civil Aviation (DGCA) chuan international flight hi July 31 thleng hi chuan thlawh tir a la ni dawn lo tih an sawi tawh bawk.