LAC buaina chungchangah NSA leh China FM an inbia
Ladakh-a Galwan Valley-a India leh China inrina, Line of Actual Control (LAC)-a tun hnaia ram pahnih sipaite intihbuaina thleng chungchangah Pathianni zan khan national security advisor Ajit Doval leh China foreign minister leh state councilor Wang Yi-te chu video call hmangin an inbia.
Hruaitu pahnihte hian darkar hnih dawn an inbia a, ramria boruak ṭha siam a, buaina a chhuah tawh lohna tura theihtawp chhuaha thawhho zel an duh thute an sawi. Inbiakna neih a nih hnu, nimin zing khan India leh China sipaite chu LAC-a an inepna hmun aṭangin an tawlh kir ve ve nia sawi a ni a, China sipaite chuan Patrolling Point 14-a puan in an kaih leh thil dang an siamte pawh an tichhe nghal nia sawi a ni bawk.
Hemi rual hian China sipai tawlh kir hi eng zat chiah nge an ni tih hriat chian a la ni lo a, Finger 4 lamah chuan an la chesawn lo a, Depsang bulge-a Y-Junction ah pawh an la awm chhunzawm tho nia hriat a ni. June 15 zana Galwan Valley-a India leh China sipaite intihbuaina thlengah khan India sipai 20 in nunna an chan a ni. China sipai zingah pawh thi leh hliam tuar an awm nia sawi ni mah se, a zat hi China chuan a puangzar lo thung.