SC-in Adultery law a hnawl

Supreme Court chuan uirena chungchanga dan siam, Adultery law chu ram danpui nena inmil lo a ni tiin a hnawl.

Indian Penal Code Section 497 chuan uire chu dan bawhchhiatna, crime niin a sawi a, mahse Supreme Court chuan he section in a tarlan dan hi hmasang thil, awmze mumal nei lo niin a sawi.

Chief Justice of India Dipak Misra chuan uirena chuan thil ṭha lo zawk, intihhlumna hialte a thlen a nih loh chuan dan bawhchhiatna a ni lo tih a sawi. Section 497-a uirena chungchang a tarlan dan chu na taka sawiselin, uirena chuan nupui pasal inṭhenna thlengin thlen thei mah se, dan bawhchhiatna, criminal offence a ni thei lo, a ti.

IPC Section 497-ah chuan midang nupui mipat hmeichhiatna hmanpuitu, a hmeichhe pasal remtihna leh hriatpui loa mutpuitu mipa chu uirena suala lut a ni a, kum nga thleng tantir emaw, pawisa chawitir emaw, a pahnih emawa hremna pek theih a ni tih a ni. He thilah hian a tuartu ber, a hmeichhia chu a pasal bungrua ang maia ngaih niin, hremna pek a ni ve lo thung.

Supreme Court chuan he section hian hmeichhiate chu duhthlanna siam ve thei loin a siam a ni, a ti. Chief Justice Misra chuan nupuite chu bungrua ang mai an ni lo a, pasal chu a nupui chunga roreltu, hotu a ni lo tih sawichhuah a hun tawh a ni, a ti.

Judge panga awmna constitution bench chuan uirena khapna dan hi ram tam zawkin an lo titawp tawh tih an sawi a, uirena dan bawhchhiatna anga ngaih chu hnungtawlhna a ni zawk tih a sawi. Court thurel a puanchhuahnaah, Chief Justice chuan ram danpui ropuina chuan mitin a huam tel vang a ni tiin, eng dan pawh mihring zahawmna leh hmeichhia dikna chanvo tichhetu chu ram danpui tithinurtu a ni, a ti.

Nimina adultery law chungchang ngaihtuahnaah hian sorkar laipui chuan uirena chu dan bawhchhiatna anga dah zel a duhthu sawiin, hei hi inneih zahawmna vawnhimna tur a ni, a ti. Hetihlai hian court chuan uirena chu inneihna tichhetu ni loin, inneihna boruak chhe tawh lanchhuahna zawk a ni, tiin a sawi.

Supreme Court-in adultery law chungchanga thutlukna a siam dan chu lawyer leh activist hrang hrangte chuan lawmawm an tih thu an sawi. Supreme Court senior laywer Prashand Bhushan chuan dan hlui leh awmze nei lo dahbona tur thutlukna ṭha tak siam a ni ta a ni, a ti. National Commission of Women chief Rekha Sharma pawhin court rorel dan chu lawmawm a tih thu sawiin, he dan hi tihbo a ni daih tawh tur a ni, a ti. Sharma chuan he dan hi British hunlaia siam a ni a, mahse British ngei pawh hian hun rei tak liamtaah an tihbo tawh laiin, India-ah chuan hman ala ni reng tih a sawi.

Social activist Ranjana Kumari chuan hmeichhiate taksa chunga mipa rorel theihna dan awm chu pawm theih a ni lo tiin, SC-in mipaten an bungrua ang maia hmeichhiate an dah theihna dan siam a hnawl ta chu lawmawm a tih thu a sawi bawk.