MCI ṭhiahna tur thupek tichhuak

Union cabinet chuan Nilaini khan eirukna kaihhnawiha hmingchhe tak, medical education regulator, Medical Council of India ṭhiat a, board of governors (BoG) kuta dahna tur thupek a tichhuak.

MCI hi ṭhiatin, sorkarin a ruat board of governors (BoG) in a enkawl hrih dawn a ni. Board member-ah hian ramchhung doctor hriat hlawk tak takte dah tel an ni. BoG hian Parliament-in commission thar hmanga MCI thlakna tur bill siam a pawm hma chu a enkawl hrih dawn a ni.

Finance Minister Arun Jaitley-a chuan MCI hminga thiltih chu committee kaltlang vek hian tih a ni dawn tih a sawi. Cabinet chuan a thlakna tur thupek hi Nilaini zing khan pawmin, hemi ni vek hian President chuan a pawmpui nghal tih a sawi. Ramchhunga doctor lar tak takte chuan MCI hi an enkawl rih dawn a ni, a ti.

Board of governors-ah hian NITI Aayog member VK Paul, AIIMS Delhi director Randeep Guleria, PGIMER Chandigarh director Jagat Ram, NIMHANS Bangalore director BN Gangadhar leh AIIMS Department of Endocrinology and Metabolism professor Nikhil Tandon te an tel. Director general health services S Venkatesh leh director general ICMR Balram Bhargava te chu ex-officio member an ni ang.

MCI hi National Medical Commission-a thlak tum niin parliament-ah bill a la tang mek a ni. MCI office bearers-te hi eiruknaa inhnamhnawiha puhin medical college-te hnenah accreditation pek an nih dan pawh chhui mek a ni bawk.