SC-in Sabarimala Temple-ah hmeichhiate luh phalsak

Kerala-a Hindu temple lar tak, Sabarmala temple-a hmeichhia kum 10-50 inkarte luh khapsakna chu nimin khan Supreme Court chuan a titawp a, he temple hi hmeichhia tupawhin an tlawh phalsak a ni tur a ni, a ti.

He temple an pathian lu ber, Lord Ayyappa chu nupui nei lo a nih avangin kum tam tak chhung chu temple-ah hian hmeichhia, thla tin thi nei rual, kum 10-50 chu temple thianghlimna tibawrhbang thei nia ngaiin an luh khapsak an ni.

Temple-a hmeichhiate luh khapsak an nih chungchanga petition eng maw zat lut chu August 1 khan judge panga awmna constitution bench, Chief Justice Dipak Misra kaihhruai chuan a lo ngaihtuah ṭan tawh a, nimin khan an thutlukna hi an puang ta a ni.

Chief Justice Dipak Misra chuan court thutlukna hi puangin, "Lord Ayappa hi sakhaw hran a ni lo. An sakhua biak danah hmeichhia leh mipate chuan dikna chanvo an nei vek a ni", a ti. Sakhaw biak dan chungchanga mipa leh hmeichhia thliarhranna chu ram danpui kalh a ni, a ti bawk.

Temple-a hmeichhia luh khap chungchang ngaihtuahnaah han, kum 800-a upa Lord Ayyappa temple enkawltu Travancore Devaswom Board chuan court hnenah hian khapna siam hi hmeichhiate dodalna a ni lo tih sawiin, hmeichhiate ngei pawhin he dan hi an pawm a ni, a ti. Mahse court chuan an thusawi hi a pawmsak lo a ni.