Adultery law: DCW hotuin SC thutlukna sawisel

Supreme Court chuan Ningani-a Adultery law hnawl a, uirena chu dan bawhchhiatna a ni lo tia thutlukna a siam chu mi tam takin an lawm thu an sawi laiin, expert ṭhenkhat chuan an sawisel thung a, court thutlukna siam hi kawppui nei chunga midang kawp phalna licence pekna ang hialah a chang thei dawn niin an sawi.

Court rorel dan sawiseltu zingah hian Delhi Commission for Women chief Swati Maliwal pawh a tel a, adultery law hnawl ringawt hian hmeichhiate natna a tihzual phah zawk dawn a ni, a ti. Maliwal-i chuan, "Adultery law chungchangah Supreme Court rorel dan hi ka pawm lo, a thutluka siam hi hmeichhiate tana ṭha lo a ni. A lan danah chuan ram mipuite hnenah nupui pasal nei tura phalna pek rualin, kawppui nei chunga midang kawp phalna pek ang a ni" tiin, inneihna thianghlimna chu eng nge ni ta ang? tiin zawhna a siam.

Social activist Brinda Adige pawh thil awmdan sawichiang turin a phut a, court thutlukna siam hian nupui pakhat aia tam neih phalna a pe em tih a zawt zui bawk. "Mipate chu nupui vawi hnih vawi thum neite an awm a, a nupui hmasate an thlauhthlak chuan harsatna nasa tak a awm ṭhin. Mahse uirena hi dan bawhchhiatna a nih tawh loh chuan, midang a neihsan a nupui hmasa chuan engtinge a lakah thubuai a thehluh theih tawh ang. Hei hi ngaihtuah tel a ngai a ni", a ti.

Congress hruaitu Renuka Chowdhury pawhin court-in midang nupui, an pasalte remtihna leh hriatpuina tel loa lo mutpuitu dan bawhchhia nia puhna a hnawl chuan hmeichhiate tana ṭhatna a thlenna tur a hre lo tih sawiin, mipate chuan hmeichhiate chu inṭhenna mumal awm loin an thlauhthla thei mai dawn niin a sawi.

Supreme Court chuan uirena chu dan bawhchhiatna anga ngaih a ni dawn lo tih sawi mah se, thil ṭha lo tak, inneihna tichhe theitu anga ngaih a ni reng dawn tho tih a sawi a ni.