India-in Iran oil lei chhunzawm zel dawn

India chuan Iran oil a lei chhunzawm zel dawn a, ram pahnihte chuan an thawhdunna an kalpui chhunzawm zel dawn tih Iran Foreign Minister Mohammad Javad Zarif chuan External Affairs Minister Sushma Swaraj-i nena meeting an neih zawhah a sawi.

Iran leh world power ram parukten nuclear deal an siam aṭangin US chu a inhnukdawk a, hemi hnu hian the Organization of the Petroleum Exporting Countries (OPEC) zinga oil siamchhuak tam lama pathumna, Iran hrekna thar a siam zui a ni. He hrekna hi November 4 aṭangin a hmang ṭan dawn a, hrekna hman a nih hunah a thawhpui ramte chu Iran oil an leisak ṭhinte titawp turin US chuan a nawr zui bawk. India hi China dawta Iran oil leitu lian ber ram a ni a, a oil lei zat hi titlem tawh mah se leisak tawh loh a tum leh tum loh chungchang a la sawi lang lo. Ningani khan UN General Assembly kar lakah Zarif leh Swaraj-i te hian New York-ah meeting an nei a, meeting zawh hnuah India-in an ram oil lei chhunzawm zel a tum thu hi Iran minister chuan a sawi a ni.