Budget-ah mi rethei, middle class leh ṭhalaite dah pawimawh a ni: PM

Prime minister Narendra Modi chuan union budget 2022-23 ah mi rethei, middle class leh ṭhalaite ngaih pawimawh an ni a, an mamawhte pek tum a ni, tiin a sawi.

Nimina video confernce hmanga BJP buatsaih, Aatmanirbhar Arthvyavastha programme-a thu a sawiah, PM chuan India chu ramdangte rinchhan lo, mahnia intodelhna siam a pawimawh thu sawiin, hemi kawng zawh tur hian budget-ah hian ruahmanna pawimawh tak tak siam a ni, a ti. Covid hri len hnua khawvel thar lo awm tur chu a hlimthla a lang ṭan tawh a ni, a ti. Khawvelin India an hmuh dan pawh a danglam chho zel tih sawiin, thiltithei leh chak zawk India hmuh an duh a ni, a ti.

PM Modi chuan politics lama ngaihdan hrang hrangte dahṭhain, pawl hrang hrang aṭangin budget thar chu ṭha an ti tlang hle a ni, a ti. Sorkarin policy ṭha tak tak a siam avangin, kum sarih liam taa India GDP Rs vaibelchhe nuai 1.0 chu tunah chuan Rs vaibelchhe nuai 2.3 a ni tawh a ni, a ti bawk.

Budget chu mi retheite pual zawk a ni tiin, budget tharah hian miretheite in nuai 80 sak belh leh tura ruahman a ni a, hemi atan hian cheng vaibelchhe 28,000 dah a ni, a ti. Hemi hmang hian mi tam tak retheihna khur aṭangin khaichhuakin, hmasawn turin a pui thei dawn tih PM chuan a sawi bawk.

Loneitute an lawm lo, phuba lak tumnaah an ngai
Union finance minister Nirmala Sitharaman-i'n Thawhlehnia union budget 2022-23 a pharhah, budget pumpui aṭanga agriculture sector share chu kum 2021-22-a 4.26% aṭangin budget tharah hian 3.84% ah a tlahniam.

Finance Minister Sitharaman budget speech-ah hian agricultural technology leh a kaihhnawiha starts-up te chu dah pawimawhin, buh leh paddy leina tur minimum support price (MSP) tihsanna tur puang mah se, loneitu pawlte chu buh leh paddy dang ni loa an tharchhuah dang leina ngaihsak tawk a ni lo leh, fertilizer subsidy tihniam a nih avangin an lungawi lo hle. Sorkar laipuiin kum 2022-a loneitute sum lakluh a leta tihpun tuma target a siam chu he budget tharah hian sawilan a ni lo bawk a ni.

Loneitu pawlte chuan agricultural expenditure lam dah pawimawh a ni loh avangin an lungawi lo hle tih sawiin, he budget hi sorkar laipuiin loneitute laka phuba lak a tumna nia an ngaih thu Bharaitya Kisan Union (BKU) hotu Rakesh Tikait chuan a sawi. An lungawi lohna an sawi lan zingah hian PM-KISAN sum dah tihsan a ni lo te, PM-ASHA scheme budget Rs vbc 400 aṭanga Rs vbc 1-a tihniam a ni te, Agriculture Infrastructure Fund semchhuah tlem lutuk te a tel.