UP assembly election : Congress-in Akhilesh Yadav dinnaah candidate siam lo

Uttar Pradesh assembly inthlan neih turah, Samajwadi party hruaitu leh chief minister hlui Akhilesh Yadav dinna, Karhal bialah Congress party chuan candidate a siam lo.

Karhal bial bakah, Akhilesh Yadav-a pu, Shivpal Yadav dinna, Jaswant Nagar bialah Congress party hian candidate an dah lo bawk a ni.

UP Congress general secretary Prakash Pradhan chuan SP hotu, Mulayam Singh Yadav-a'n Congress party hotute dinna bialah an party candidate tur a dah ve loh avangin, central lama Congress hruaitute pawhin Akhilesh Yadav dinna bialah hian candidate siam ve lo turin an hrilh tih a sawi. A tirah chuan Congress party hian Karhal bialah hian Gyanwawti Yadav din tir an tum a, mahse Akhilesh Yadav-a'n he biala din tuma nomination a thehluh hnuah Congress party hian candidate siam tum hi an sut leh ta tih Pradhan chuan a sawi. Akhilesh hi Karhal biala a din ṭum khatna tur a ni. He bial hi thawh thuma vote thlak tur zingah telin, February 20-ah vote thlak a ni ang.

Hetih lai hian BJP chuan Akhilesh Yadav khing tur hian union minister SP Singh Baghel an dah thung. Baghel hi Akhilesh-a pa, Mulayam Singh Yadav nena inpawh ṭha tak an ni ṭhin. Inthlan hmasaah Baghel hian Akhilesh Yadav nupui, Dimple Yadav a lo khing tawh a, a chak zo lo a ni.

Uttar Pradesh assembly inthlan hi thawh sarihah neih a ni dawn a, February 10 - March 7 chhungin inthlan hi neih a ni ang.

Kum 2017 assembly inthlanah khan BJP chu hneh taka thlan tlin niin, Assembly seat 403 awmah seat 312-ah an chak a ni. SP hian seat 47 lain, BSP-in seat 19 leh Congress-in seat sarih an la a ni.