SC-in GATE 2022 exam sawn hla tura ngenna a hnawl

Supreme Court chuan India rama Covid-19 hri leng thawh thumna thleng mek avanga Graduate Aptitude Test in Engineering (GATE 2022) exam neih hun sawn hla tura ngenna chu nimin khan a hnawl. Exam tikhawtlai chuan zirlaite zingah buaina leh chiaina a thlen theih thu an sawi.

GATE exam hi engineering leh science undergraduate paltlang tawhte'n master's programme admission leh public sector company-ah hna an hmuh theihna tura exam pawimawh tak a ni. SC aṭanga phalna hmuh a nih tak avangin GATE 2022 exam hi a hmaa an lo ruahman lawk tawh, February 5, 6, 12, leh 13-ah te neih a ni ang.

Supreme Court-a hian GATE candidate 11 velin exam hun sawn hla tura ngenna hi thlenin, sorkar laipui leh GATE 2022 buatsaihtu Indian Institute of Technology (IIT), Kharagpur hnenah ramchhunga Covid-19 pung chho zel karah exam sawn tura hrilh turin an ngen a ni.

"Hri leng thawh thumna thleng mek karah, Covid-19 variant thar Omicron vangin state khawpui tam takah hri hi a darh mek a ni. Mi hrang hrang leh IIT Kanpur zirchianna lakkhawm aṭangin February thla tir lam hian hri leng chuan a peak a thleng dawn a, April thlaah a tawp dawn tih an sawi. Heng a nih avang hian, GATE exam tura duan ni leh a peak thlen hun hi a intawng chho dawn a ni," tiin ngenna an thehluhah an ziak. "Exam kan sawn hla lo a nih chuan, GATE 2022 exam turte hian hri kai theihna leh thehdarh theihna risk sang tak an nei a, an nunna leh an chenpuite nunna derthawngah an dah thei a ni," an ti.

Hetih lai hian Justice DY Chandrachud kaihhruai apex court bench chuan exam chungchang chu sorkar lam ngaihtuah tur a nih thu sawiin, he thila court a lo inrawlh ve chuan zirlai zingah buaina leh chiaina a thlen theih thu a sawi.

Court chuan Covid-19 hri leng thawh khatna leh thawh hnihna kha tuna hri leng mek, a thawh thumna nen chuan in an lohna tam tak a nei tawh tih a sawi. Hri leng vang hian sorkar hnuaia sorkarin exam a buatsaih 20 vel chu sawn hlat a lo ni tawh a ni, a ti.

"Hetiang mai chuan exam hi kan sawnhla thei lo a ni," tiin court chuan a sawi a,"Thil engkim hawn a ni tawh a, zirlaite hmakhua hi infiamnna atan kan hmang thei lo. Petitioner pakhat chu coaching center neitu a ni. Hei hi academic policy chungchang zawk a ni," tiin a sawi.

Supreme Court chuan exam hmachhawn tur hian ramchhunga zirlai nuai chuang an inbuatsaih laiin, candidate 20,000 vel chauhin exam sawn hla turin online petition an sign tih a sawi bawk.