India ram chinah Pakistan helicopter thlawk lut

Indian Army chuan Pathianni khan Pakistan Army-te chuan Jammu and Kashmir-a Poon district-a Pir Panjal Valley-ah Line of Control (LoC) palzutin India ram boruak chin an rawn lut leh niin a sawi.

Defence thupuangtu Lt. Col. Devendra Anand chuan Poonch sector-ah hian chhun dar 12.10 vel khan Pakistan sector a rawn thlawk lut niin a sawi. Report-in a tarlan danin, Pakistan sipai helicopter hi LoC chu meter 250 vela rawn pelin, India ram chin boruakah Pakistan helicopter hi minute nga chhung vel a thlawk a ni.

Sipai thupuangtu chuan helicopter hi civil chopper pawh a ni maithei niin a sawi a, a thlawk sang hle a ni, a ti. Ramri-a duty-te chuan lo hmuin, hnawh kir nan silai pawh an lo hmetpuak niin a sawi. Mahse Army hian helicopter hi eng anga rei leh, eng anga thukah nge a rawn thlawh luh erawh an sawilang lo.

India leh Pakistan in inremna an lo siam tawh angin, helicopter hi LoC aṭanga km 1 chhungah thlawh luh an khap a ni.

Nimin vek khan Kashmir hmarlama Kupwara-ah LoC-a India leh Pakistan sipaite an inkap. Army chuan Inrinni zan khan Tanghdar Sector-a LoC kana India rama rawn luh ruk tumte an lo dang thu an sawi a, heng mite hi Paksitan Army chuan an pui a ni, a ti.

Kashmir-a Shopian district-ah nimin khan helhoin police station beiin constable pakahat an kaphlum. Helho hian police station hi silaia pawng kahin, duty lai constable Saqib Ahmad Mir chuan hliam na tak a tuar a, damdawi-ina hruai a nih hnuah a thi a ni. Kar hnih liamta khan Hizbul Mujahideen firfiak pawl chuan police pathum ruboin a hnuah an that zui bawk. Mujahideen-ten an kahhlum zinga pahnih hi special police officer (SPO) an ni.