Haryana CM-in Gurdwara tlawh tur ṭhulh

Haryana Chief Minister Manohar Lal Khattar-an Dachar khuaa Gurdwara tlawh a tum chu shrine thuneituten Sikh organization Damdami Taksa hotu, Jarnail Singh Bhindranwale thlalak intar an lakthlak duh loh avangin a ṭhulh.

Khattar hian a bial, Karnal a tlawh kualnaah Gurdwara hi tlawh nghal a tum a ni. "Gurdwara tlawh tur hian hun pawh ka insiam a ni. Mahse he hmunah hian Bhindranwale thlalak a intar tih thu ka dawn avangin Gurdwara committe member-te hnenah a thlalak hi dahbo turin ka ngen a ni. Mahse thlalak hi an dahbo duh loh vangin ka tlawh ṭum pawh ka ṭhulh ta a ni", a ti. Gurdwara thuneitute lam chuan he thlalak hian kum eng emaw zat kalta aṭanga tar a ni tawh tih sawiin, an lakthlak chuan tualchhung mite an lungawi dawn lo niin a sawi. Hemi rual hian Bhindranwale thlalak lakthlak a nih loh chuan CM hian a tlawh duh dawn lo tih erawh thuneituten an hrilh lo niin an sawi.

CM thiltih vang hian tualchhung mite an lungawi lo hle a, Gurdwara hnenah hian ngaihdam dil tura an phut thu sawiin, a dil duh lo a nih chuan BJP chu boycott an tum tih an sawi. October 6 hian Dachar khaw mite hian meeting an nei leh dawn a, hemi hun thleng hi ngaihdam dil turin CM hi an nghak ang a, a dil lo a nih chuan November 1-a PM Narendra Modi-an Karnal-a rally a neih tur chu an boycott dawn tih an sawi.