Election Commission-in Roadshow huaihawt khap chhunzawm zel

Election Commission chuan assembly inthlan neihna tur state panga-a roadshow, 'pad yatras', cycle leh vehicle rally huaihawt khapna chu a pawtsei a, hetihlai hian indoor leh outdoor political meet-a inkaihhruaina erawh an thlahdul thung.

Kar liam ta Inrinni khan panel-te leh Ministry of Health and Family Welfare secretary te inhmukhawm chuan ramchhunga coronavirus hri leng mek dinhmun uluk taka an thlir hnuah he thutlukna hi an siam.

"Outdoor meeting, indoor meeting, rally chungchanga khuahkhirhna siam chu thlahdul deuhin, indoor hall-ah mipui lengzat aṭanga 50% chu an kalkhawm thei a, open ground-ah capacity 30% emaw DEO-in kaihhruaina ang emawin social distancing norms zawm chungin khuahkhirhna hi la thlahdul leh theih a ni," tiin panel chuan a sawi.

EC hian India rama Covid-19 kai an pun chak em avangin January 8 khan political rally khapna hi a lo tichhuak tawh a ni. Panel chuan hri leng dinhmun thlirin khuahkhirhna hi a thlahdul chho hret hret zel a ni.

Uttar Pradesh, Goa, Manipur, Punjab, leh Uttarakhand-te chuan February 10 aṭangin assembly intlan thawh sarihin an nei dawn a, March 10-ah vote chhiar a ni ang. Roadshow leh physical rally-te khap a nih avangin political party-te chuan social media leh virtual rally hmangin an campaign mek.

Assembly election neihna tur state-a chief secretary ṭheuhte chuan Covid hri leng dinhmun, hri kai zat leh damdawi-ina enkawl ngai zat chu zawi muangin a tlahniam ve zel tih commission hnenah ziakin an lo hriattir tawh a ni. Special observer te chuan campaign guidelines ennawn a khuahkhirhna chu thlahdul leh turin panel hnenah an thlen a, Commission chuan an rawtnate ngaihtuahin health secretary chu meeting a neihpui a ni.

Commission chuan inthlan neihna tur pangaah hian hri leng chu January 22 khan a peak a thleng tawh nia sawiin hetih hunlai hian heng state-a hri kai hmuh chhuah belhkhawm hi ni khatah mi 30,000 chuangte an tling. February 5-ah chuan hri kai thar hi 7,000 vel ni tawhin hri kai thar zat hi a tlahniam tawh hle tih a sawi.

Door-to-door campaign-a mi 20 aia tam tel phal lo tih chu hman chhunzawm a la ni dawn a, mahse campaign hi zan dar 8 aṭanga a tuk zing dar 8 thleng neih khap a ni thung.