Lata Mangeshkar sûnnan ni 2 hnam puanzar a ngul chanveah zar dawn

Indian rama rimawi lama hmingthang, Nightingale of India tih hiala hming lem an pek Lata Mangeshkar chu kum 92 mi niin nimin khan Mumbai-a Breach Candy Hospital-ah a thi. Nizan khan state chawimawina famkim nen vui liam a ni.

Ram pumah Mangeshkar hi ni hnih chhung sûn a ni dawn a, hemi chhung hian hnam puanzar a ngul chanveah zar a ni ang.

Lata Mangeshkar hi January thla khan Covid-19 leh pneumonia vangin damdawi-inah dahluh a ni. January 8 khan ICU-ah dahluh leh a ni. Covid laka a fihlim hnu pawh hian a dinhmun hian ṭhat lam a pan thei lo a, Inrinni aṭang khan ventilator hmantir a ni a, nimin khan a thi ta a ni.

Pandit Deenanath Mangeshkar leh Shevanti Mangeshkar-te fanu, Lata Mangeshkar hi September 28, 1929 khan Indore, Madhya Pradesh-ah a piang. A pain a boral san hma avangin kum 13 mi lek anih laiin a eizawnna bul hi ṭanin, hemi hmang hian a nu leh a unau dang palite chu a enkawl chhunzawm a ni. Marathi musician leh theatre artiste hlawhtling tak a nih theih chhanah music lama entawn tur ṭha tak pa a neih vang anih thu a sawi uar ṭhin hle. Lata Mangeshkar chuan Hindi hla hmasa ber "Mata Ek Sapoot Ki Duniya Badal De Tu" a tihchhuah hnuah Bollywood lama milar Anil Biswas, Shankar Jaikishan, Naushad Ali, SD Burman leh midang tam tak a thawhpui chho a ni. Movie hla 1,000 chuangah a zai hman a, Bollywood playback singer zinga hlawhtling leh lawm hlawh ber zinga mi a ni.

Prime Minister Narendra Modi chuan chawimawina sang, Bharat Ratna pawh lo dawng tawh, Lata Mangeshkar a ui thu sawiin, "Chhuan thar lo kal turte pawh hian India hnam tana a thawhhlawk zia te, a aw mawi danglam leh mipui hneh theihna mak dangdai tak a neihte hi an hrereng dawn a ni," a ti.