Pakistan-in India puhna pha

Indian Army-ten Jammu and Kashmir-a Line of Control (LoC) pelin India ram boruak chinah Pakistan helicopter a rawn thlawk lut nia a sawi chu thu dik lo niin Pakistan chuan a sawi.

Pakistan media-te chuan helicopter-ah hian Pakistan-occupied-Kashmir (PoK) Prime Minister Raja Farooq Haider a chuang niin an sawi a, India ram boruak chinah a thlawk lut lo a, LoC bula a thlawh lai hian Indian Army-te chuan helicopter lam hawi hian silai an lo hmetpuak zawk a ni, an ti.

Pakistan-a Dawn News-in a tarlan danin, LoC bula thlawk helicopter-ah hian PoK PM Haider bakah a minister pahnihte an chuang niin a sawi. POK official-te hi cabinet member pakhat, a unaupa thi ral tura kal an nih thu a tarlang bawk.

Helicopter hian Pakistan ram chin a thlawh pel lo tih sawiin, Haider chuan Indian Army-te chuan an chuanna helicopter chu an rawn kap thut mai niin Dawn News a hrilh. Civilian helicopter-a chuang an nih avangin India thuneitute hnenah pawh chanchin hriattir a ngai kher lo tih a sawi bawk a, a hma pawhin he hmun hi a lo tlawh fo a, hetianga beihna hi an tawk ngai lo niin a sawi.

Hetihlai hian India thuneitute chaun Pakistan helicopter hian India ram boruak chin meter 250 vel zet a rawn thlawk lut niin an sawi thung. Pakistan sorkar hnenah pawh an lungawi loh thu thlen an tum.