Ram temple sak phutin Hindu puithiamten chaw nghei

Ayodhya-a Ram temple sak thuai a nih theihna tura Prime Minister Narendra Modi-a kaihhruai NDA nawr nan nimin aṭang khan Ayodhya-a Hindu puithiamte tiam chin awm loin chaw an nghei ṭan.

Ayodhya-a Tapasvi Chavni temple puithiam, Mahant Paramhans Das kaihhruaiin Ayodhya puithiam leh ramchhung hmun danga puithiam eng emaw zat chuan he nawrh huaihawt hi an zawm a ni. Das chuan, "Bharatiya Janata Party (BJP) chu Ram temple sak a nih theihna tura dan siam turin kan phut a ni. Temple hi a rang thei ang bera sak a ni tur a ni a, hemi chungchangah hian PM Modi pawh ṭawngchhuak turin leh Ram temple sakna tura thutlukna siam turin kan duh a ni", a ti.

Nawrh huaihawt ṭan hma hian Tapasvi Chavini temple chhungah hian 'Shila Pujan' an nei a ni. Hindu puithiamte chuan Ayodhya-a Ram Temple sakna tur chungchang buaina awmah PM Modi-a kaihhruai sorkar a inrawlh duh lo chu an lungawi loh thu an sawi bawk.

Uttar Pradesh Chief Minister Yogi Adityanath pawhin Ayodhya buaina chu chinfel thuai a duh thu a sawi a, ram mipuite pawhin he buaina chinfel hun hi an nghakhlel tawh a ni, a ti.

Hetihlai hian Supreme Court chuan Ayodhya buaina kaihhnawih thubuai chu constitution bench lian zawk hnenah hlan a duh lo. Kar kalta Ningani khan a thurel hi puangin, Supreme Court chuan sakhaw tin leh sakhaw hmun tinte chu ang khat vek en an ni tur a ni, a ti.