ATM aṭanga pawisa lak chhuah theih zat titlem dawn

State Bank of India (SBI) chuan October 31 aṭang hian ATM aṭanga pawisa faia lakchhuah theih zat, ni khata Rs 40,000 chin ni ṭhin chu Rs 20,000-ah a tihniam dawn.

SBI official chuan bank hrang hrang aṭanga ATM aṭanga dik lo taka pawisa lakchhuah complaint a awm fo avang leh, digital leh cashless transaction hman uar zawk a nih theihna turin ATM aṭanga pawisa faia lakchhuah theih zat hi tihhniam an tum tih a sawi. Hei ruahmanna thar hi 'Classic' leh 'Maestro' debit card-ah bik a nih tur thu a sawi bawk.

SBI managing director PK Gupta chuan, zirchianna an neih aṭangin mi tam zawkin ATM aṭanga sum a lakchhuah hi ni khatah Rs 20,000 aiin a tlem tlangpui a, hei vang hian Rs 20,000 china bithliah an siam chu customer tam zawk tan pawh a ṭha tawk dawn niin a sawi. Pawisa lakchhuah theih zat tihtlem hian thil dik loa tih a tihtlem phah theih an beisei thu a sawi.

Gupta chuan nikhata Rs 20,000 aia tam lakchhuah mamawh te tan chuan card dang, a tam zawka lakchhuah theihna tur an dil thei ang a ti. Hemi rual hian hetiang card chu bank account-a an minimum balance a san ve a ngai thung dawn a ni, a ti.

Digital transaction hman uar ni chho viau mah se pawisa faia lakchhuah duh pawh an la pung zel tho a ni. Reserve Bank of India (RBI) data-a a lan danin, kumin April thla tawp thlenga pawisa faia lakchhuah duh kha nikum November thla aiin 7% in a sang an la tam zawk a ni. Hetihlai hian kumin May thla thleng khan bank hrang hrangte chuan credit card maktaduai 37.5 leh debit card maktaduai 861 an pechhuak tawh .

August thla khan Home Ministry chuan nakkum aṭangin ATM te chu khawpui-a dar 9 hnu leh, rural area-ah dar 6 hnuah hawn an nih tawh dawn lo thu a sawi a, pawisa dahluh dawn pawhin armed guard pahnihin an veng zel dawn tih a sawi bawk.