Loneituten Delhi panin kawng an zawh

Loneitu pawl Bharatiya Kisan Union huaihawtin nimin khan loneitu mi 20,000 velin Haridwar aṭangin Delhi panin kawng an zawh.

Loneitute hian an thil phut hrang hrang 15 tihlawhtling tura sorkar phutin kawng hi an zawh a, an thil phut zingah hian loan ba ngaihdam, fu man ba tihkhawtlai mek tihfel leh Swaminathan Committee Report a taka kalpuite a tel.

BKU hruaitu Rakesh Tikait-a kaihhruaia kawngzawhte hian Thawhṭanni tlai khan Ghaziabad an thleng a, UP minister pahnih Suresh Rana leh Laxmi Narayan Chaudarty te in bulah an inkulh nghal a ni. Tikait chuan an thil phut tihhlawhtlin a nih hma chuan kawng an zawh chhunzawm zel tur thu a sawi a, hemi rual hian minister te pawh hi inbiakna neihpui zel an tum tih a sawi. An thil phutte ngaihsak an nih hunah an nawrh chu an titawp dawn tih a sawi. An thil phut tihhlawhtlin nan sorkar chu kum li hun an pe tawh a, an ngaihsak a hun ve tawh a ni, a ti.

Loneitute thil phut zingah hian tubewell atana a thlawna electric hman tir te bakah Pradhan Mantri Fasal Bima Yojna chu thlai chitin huap tir leh, a premium pawh sorkarin a pekte a tel a ni. Loneitu kum 60 tling tawhte chu thla tin pension Rs 5,000 pek te, sum lama harsatna nasa tak an tawh avanga mahni intihhlum phah loneitu chhungte chhawmdawlna pek pawh a tel bawk.

Kawngzawh huaihawt a nih vang hian Delhi police te chuan Uttar Pradesh ramri-ah punkhawm khapna thupek an tichhuak nghal a ni.