CJI thar atan Justice Ranjan Gogoi lalut

Justice Ranjan Gogoi chu nimin khan Chief Justice of India (CJI) thar atan rinawmna thu tiam tira lakluh a ni.

President Ram Nath Kovind chuan Rashtrapati Bhavan-a Darbal Hall-ah kum 63 mi, Justice Gogoi hi rinawmna thu tiam tirin, CJI thar atan a lalut. Gogoi hian October 2-a chawl, Chief Justice hlui Dipak Misra a thlak a ni.

Justice Gogoi hian a hna hi thla 13 chhung a thawk thei dawn a, kum 2019 November 17-ah a chawl ang.

Chief Justice thar Justice Gogoi chanchin tlangpui:

* Hmarchhak bial aṭanga Chief Justice dinhmun chelh thei hmasa ber a ni.

* Kum 1954, November 18-ah a piang a, a pa chu kum 1982-a Assam chief minister, Keshab Chandra Gogoi a ni.

* Kum 1978-ah bar a zawm a, Gauhati High Court-ah a practice.

* Kum 2001, February 28 ah Gauhati High Court Permanent Judge atan ruat a ni.

* Gauhati High Court-a kum kua a awm hnuin, kum 2010 September 9 khan Punjab & Haryana High Court-ah sawn a ni.

* Kum khat hnu, kum 2011 February 12-ah Punjab & Haryana High Court Chief Justice atan ruat a ni.

* Kum 2012, Arpil 23-ah Supreme Court judge-ah hlankai a ni.

* Kumin January thlaa Supreme Court senior judge pali-ten Chief Justice nilai Dipak Misra rorel dan leh, thubuai ngaihtuah tur a sem dan an lungawi loh thu sawia press conference an neihah khan Justice Gogoi pawh hi a tel.

* Supreme Court judge a nih chhung hian thutlukna pawimawh tak tak eng emaw zat siamnaah a tel.

* Kum 2014, August 20 kah Justice Gogoi leh RK Agarwal awmna bench chuan sorkar laipui leh Assam sorkar chu dan loa Assam-a ramdang mi pemlutte dapchhuah an nih theihna tur, National Register of Citizens (NRC) update hna chu kum thum chhunga zo fel turin a hriattir.

* National Legal Service Authority (NALSA) Executive Chairman a nih angin Justice Gogoi hian rampumah legal service camp neihna tur program siamin, heng hmunah hian sorkar department hrang hrangte chuan stall an siam a, sorkar welfare scheme hrang hrangte pholangin mipuiten an chhawr theih dan turte hrilhhriat an ni. NALSA in tunhnaia report a tihchhuahah heng camp hi mi nuai 43 chuangin an chhawr niin a sawi.