Loneituten an nawrh titawp

Loneitu pawl, Bhartiya Kisan Union (BKU) huaihawta Delhi khawpui pana loneitu kawngzawhte chuan Thawhlehni zan khan an nawrh an titawp ta.

BKU huaiawt hian loneitute hian sorkar laka an thilphut hrang hrang lantir nan Kisan Kantri Yatra an huaihawt a, Delhi panin kawng an zawh a ni. Thawhlehni khan Delhi an lut tur hi police-ten an lo dang a, mahse sorkar laipui chuan zanlai vel khan nawrh huaihawtte hi Delhi luh phalna pein Uttar Pradesh leh Delhi inkara daidanna an siamte pawh police-te chuan an la sawn nghal a ni. Uttar Pradesh-Delhi ramriah hian kawngzawh leh police te hi an innawr buai hman hle a, police-te chuan tear gas leh water cannon te an hmang a, police leh loneitute zingah pawh hliam eng emaw zat an awm.

BKU hotu Naresh Tikait chuan loneitute chuan an thilphut tihlawhtling tura sorkar nawr nan ni 12 chhung kawng an zawh tawh a, Delhi khawpui luh phalsak an nih tak avangin kawng zawh hi an titawp a, mahse an thil phutte chu an la nawr chhunzawm zel dawn tih a sawi.

Sorkar laipuiin Delhi luh a phalsak hnuah loneitute phurtu, tractor 400 vel chuan nimin zing dar 3 vel khan Kisan Ghat an thleng an ni. Loneitute chuan sorkar chuan an thil phut tam zawk chu ngaihtuahsak a tiam a, heng zingah hian thlai man tihsan te pawh a tel niin an sawi.

Loneitute thil phut 15 zingah hian loan ba ngaihdam, National Capital Region (NCR)-a tractor kum 10 chin hman khapna hlih, fu man pek leh bithliah dan chungchanga MS Swaminathan Commission rawtna a taka hman te pawh a tel.

Eptu party hrang hrangte chuan loneitute nawrh huaihawt hi an thlawp thu an sawi a, BJP kaihhruai sorkar chu loneitute harsatna leh dinhmunte hriatthiampui lo leh ngaihsak lohah an puh.