State hrang hrangah school leh college hawng leh ṭan

India ramah Covid-19 hri kai thar zatin tlakhniam lam a pan zel vangin state ṭhahnem takah school, college leh zirna in dangte chu nimin aṭang khan hawn ṭan a ni. Covid-19 hri leng vanga thla tam tak an inkharkhip hnuah Uttar Pradesh, Delhi, Bihar, Kerala, Odisha, Punjab leh Gujarat-a school-te chu an kal leh ṭan a ni.

Delhi
Delhi sorkar chuan kar liam ta Zirtawpni khan khawpu chhunga school, college leh coaching institute te chu February 7, 2022 aṭanga hawn ṭan a nih tur thu a sawi. DDMA chuan class 9-12 inkar zirlaite chu nimin aṭang khan physical class neih an phalsak a ni.

"Delhi sorkar chuan school leh college-a zirlai naupangte chu an zirlai ṭan leh thei turin thutlukna a siam. School zawng zawngte (pawl 9 chin chunglam), college, institute, university, coaching chu Feb. 7 aṭangin an inhawng thei tawh ang. Nursery aṭanga Class 8 te chu Feb. 14 aṭangin an kal ṭan thei dawn a. Higher education chin chu physical mode hmang vekin an kal tawh ang," tiin deputy chief minister Manish Sisodia chuan a sawi.

Uttar Pradesh
UP sorkar chuan Inrinni liam ta zan khan Feb. 7 aṭanga school, college leh educational institution-te hawng turin thupek a tichhuak a, nimin khan zirna in hrang hrangte hawn a ni leh ta.

Additional Chief Secretary,Home, Awanish K Awasthi chuan nimin aṭang khan thuleh awm hma chu Class 9 leh a chunglamte chu hawn an ni leh tih a sawi . Zirna in hrang hrangah hian Covid-19 kaihhruaina dante khauh taka zawm tura tih a ni a, face mask vuah ṭha tur leh, helpdesk pawh siam vek tura tih an ni.

Bihar
Bihar sorkar chuan Pathianni khan state chhunga school leh college te chu hawn ṭan leh theih a nih thu an puang.

Nimin aṭang khan state chhunga Calss 9 leh a chunglamte chu full capacity-a an kal phalsak a ni a, mahse Class 8 leh a hnuai lamte erawh chu 50% capacity chauh phalsak an la ni thung.

College leh coaching institute-te pawh 100 percent capacity-a hawn theih a ni tawh bawk.

Gujarat
Gujarat sorkar chuan nimin aṭang khan Class 1-9 hawn a phalsak.

Education department thuchhuahin a tarlan danin, Covid-19 hri leng dinhmun thlir chungin, sorkar, private leh grant-in-aid school te chuan offline hmanga zirna an kalpui theih tawh thu a tarlang.

Hemi rual hian zirna inte hi online class kalpui chhunzawm zel tho tura tih an ni a, zirlaite chuan offline leh online class neihah hian an duh zawk an thlang thei dawn a ni. Offline class chu a hmaa sorkarin Standard Operating Procedure (SOP) a tihchhuah anga kalpui a nih tur thu thuchhuah chuan a tarlang.

Odisha
Odisha sorkar pawhin nimin aṭang khan school leh college hawn ṭan a nih thu a puang.

"Covid-19 hri leng dinhmunte kan ennawn hnuah, zirlaiten an hun leh zirna an hloh dante kan thlirin, state sorkar chuan school leh college-te hawng tawh turin thutlukna a siam a ni," tiin chief secretary Chandra Mahaptra chuan a sawi.

Class 8-12 inkar leh college, university bakah technical, professional education institution-te chuan nimin aṭang khan class an kal ṭeh tan a, mahse KG- Class 7-te chuan February 14 aṭangin physical class an ṭan thung ang.

Kerala
Kerala sorkar chuan kar hmasa Zirtawpni khan Feb. 7 aṭanga offline class ṭan turin thutlukna a lo siam tawh a ni.

Nimin aṭang khan Class 10, 11 leh 12 bakah college zirlaiten physical class an kal ṭan a, Class chudawn. Pawl 1-9 inkar zirlaite, creche leh kindergarten chu Feb. 14 aṭangin an kal ṭan dawn thung.

Punjab
Punjab sorkar chuan nimin aṭang khan school leh college-te hawn a phalsak.

Sorkarin thuchhuah a siamah, Class 6 leh a chunglam, college, univesity, coaching institution leh zirna in dangah physical class neih remtih a ni tawh tih a sawi. Class 6 hnuai lamte kal dan tur erawh chu la ngaihtuah ṭhat leh tur a ni a, thupek dang a awm hma chaun online class an la kal chhunzawm ang.