Covid vaccine lak nan Aadhaar kher a ngai lo : Sorkar laipui

Sorkar laipui chuan nimin khan Supreme Court-ah CoWIN portal hmanga Covid-19 vaccine laknaah Aadhaar card thehluh tel kher a ngai lo tih a hrilh. Hemi hnu hian court chuan vaccine la turte hnenah Aadhaar card dil lui tawh lo turin thuneitute a hrilh nghal bawk.

Covid vaccine lak dawnin centre ṭhenkhatin Aadhaar card kher an dil lui ṭhin nia sawia Supreme Court-a PIL thehluh chu nimin khan justice DY Chandrachuh leh Syra Kant awmna bench chuan a ngaihtuah a ni. PIL hi Pune-based lawyer leh social activist, Siddharthshankar Sharma thehluh a ni.

Ministry of health and family welfare (MoHFW) chuan hemi chungchangah hian affidavit thehlutin, Co-WIN portal hmanga vaccine la turten registration an tihnaah, nihna finfiahna tur document pakua hman theih a ni tih sawiin, Aadhaar card kher phut a ngai lo tih a sawi a ni. Bench chuan hei hi sawi chhunzawmin, document pakua zinga a eng ber emaw chu pawm theih vek a ni, thuneituten health ministry policy hi an zawm tur a ni, a ti.