Russia President Putin rawn zin

Russia President Vladimir Putin chu nimin khan ni hnih cham turin India-ah a rawn zin a, vawiinah Prime Minister Narendra Modi nen meeting an nei ang.

India rama Russia President a cham chhung hian Russia leh India thawhdunna tur inremna 20 vel ziah hman beisei a ni a, hengte hi defence, nuclear energy, space leh economy lama thawhdunna turte an ni.

Putin-a cham chhunga an ngaihtuah ber tur chu Russia aṭanga S-400 Triumf defence missile system leina tura inremna siam chungchang a ni ang. Russia President hian US dollar tluklehdingawn 5 hu inremna hi a ziakfel nghal dawn nia sawi a ni. Hetihlai hian Russia aṭanga ralthuam lei tur hian Countering America's Adversaries Through Sanctions Act (CAATSA) hnuaia US Congress-in Russa aṭanga ralthuam lei khapna a siam a palzut dawn a, mahse American lawmaker-te chuan an ngaihnathiam thei dawn nia sawi a ni.

India hian air defence tihchangtlunna turin long-range missile system neih hi a duh a, heng hi Sino-Inda border km 4,000-a thuiah hman a duh a ni. S-400 hi Russia long-range surface-to-air missile defence system zinga changtlung ber nia ngaih a ni a, China chuan sorkar leh sorkar indawrna kaltlanga lei turin kum 2014 khan inremna a lo siampui tawh a ni. S-400 hi S-300 system upgraded version a ni a, he missile system hi Almaz-Antey siam niin, kum 2007 aṭang khan Russia chuan a hmang tawh a ni.