Reservation thlak turin tumahin thuneihna an nei lo : Nitish Kumar

Bihar Chief Minister Nitish Kumar chuan Father of Indian Constitution, BR Ambedkar-an a lo duan tawh, reservation system chungchang thlak danglam turin tumahin thuneihna an nei lo niin a sawi.

Nilainia JDU-in Patna-a Dalit-Mahadalit Sammelan an huaihawtah thu sawiin, chief minister chuan Scheduled Castes leh Scheduled Tribes te dikna chanvo chu tumahin an palzut thei lo tih a sawi. Hei hi tunhnaiah Lok Sabha Speaker Sumitra Mahajan-in reservation chungchang a sawina a chhan letna a ni.

Sumitra Mahajan-i hian September 30 khan tiam chin awm loa zirna leh hna laknaa reservation siam a nih chungchang hi sawichhuakin, Ambedkar ngei pawh khan heng quota hi kum 10 chhung atan chauha siam a duh a ni, a ti. Mahajan-i chuan, "Ambedkar khan kum 10 atan chuan reservation hi a ngai niin a sawi a, kum 10 chhungin hmasawnna siam hman a tum a ni. Mahse hei hi a thleng ta lo a, Parliament ngei pawhin reservation hi a pawtsei ta zel a ni", a ti.

Nitish Kumar chuan mi ṭhenkhat chuan thil ṭul lo tak tak an sawi a, an la sawi chhunzawm zel dawn niin a sawi. A kaihhruai sorkar chuan mipuite chu a thlawp tlat zel dawn a, an tan a ding zel dawn tih a sawi. Mi tinten an dikna chanvo an hmuh vek hma chuan chawl loin an thawk zel dawn tih a sawi.