India leh Russia-in missile system leina tur inremna ziak

India-in Russia aṭanga khawvela surface-to-air missile hlauhawma ngaih, S-400 Triumf a leina tura inremna chu nimin khan ziahfel a ni ta.

US-in Russia a hrek mek avanga an hnen aṭanga ralthuam lei lo tura a ti chungin, nimin khan India rama cham mek Russia President Vladimir Putin leh Prime Minister Narendra Modi-te chuan New Delhi-a summit an neih zawh hnuah dollar tluklehdingawn 5.3 ( cheng vaibelchhe 40,000) man inremna hi an ziak ta a ni.

Russia President Vladimir Putin hian ni hnih cham turin Ningani khan India a rawn thleng a, Deputy Prime Minister Yuri Borisov, Foreign Minister Sergey Lavrov leh Trade and Industry Minister Denis Manturov ten an rawn zui.

US chuan Countering America's Adversaries Through Sanctions Act (CAATSA) hnuaiah Russia hi a hrek mek a, hei vang hian Russia aṭanga ralthuam lei ramte chu hrek an ni zui ve nghal dawn tih a sawi. He hrekna hi kum 2014-a Russia-in Ukraine-a Crimea bial a laksak vanga hremna leh, Syria tualchhung indonaa inrawlh leh 2016 US president election-a a inrawlh vanga a hremna a ni. Mahse sorkar laipui chuan US-in hreka a vau chungin Russia aṭanga ralthuam lei a lo tum tawh chu a titlang dawn tih a sawi.

Nimina Putin leh Modi-te summit neihah hian regional leh global issue hrang hrang an sawidun a, US-in Iran crude oil lakluhna tura hrekna a siam chungchangte pawh an sawidun. Nimin vek khan Putin chuan President Ram Nath Kovind a hmu bawk.

Russia siam S-400 Triumf hi khawvela long-range air defence system changkang ber zinga ngaih a ni. China chuan kum 2014 khan S-400 missile system hi a lo lei tawh a, eng zat chiah nge hlan a nih tawh tih puanzar a ni lo. Russia chuan he system hi kum 2007 aṭang khan a lo hmang ṭan tawh a ni.

Ram pahnihte hian space cooperatioan deal an ziak bawk a, he inremna siam hmang hian Russia-a Novosibirsk-ah Indian monitoring station sak a ni ang. Hei bakah hian India rama Russia-in nuclear plant pahnihna tur a siam leh theih dan tur pawh an sawidun bawk.