UN-in Rohingya thawnkir a sawisel

India sorkarin dan loa India rama lut, Rohingya Muslim mi pasarih-te Myanmar-a a thawnkir chu United Nations chuan a sawisel.

Rohingya mi pasarihte hi Assam-a Silchar Central Jail aṭangin Manipur-a hruai an nih hnuah, Ningani khan border town, Moreh kaltlangin Myanmar kutah hlan an ni. Heng mi pasarihte hi dan loa India rama rawn lut niin, kum 2012 khan man a ni a, jail-ah tantir an ni.

United Nations Secretary General Antonio Guterres chuan Rohingya mite hi thawn kir lo turin ngen mah se, ministry of external affairs (MEA) chuan heng mite hi an duhthu ang ngei leh, Myanmar sorkar remtihpuina anga thawn kir an ni tih a sawi.

Rohingya mite thawnkir an nih tum chungchang hi Supreme Court-ah thlen ni mah se, court pawh a inrawlh duh lo. Court chuan sorkar thutlukna siamah inrawlh a tum lo tih sawiin, a dang duh lo a ni. Hetihlai hian UN chuan India chuan international law a palzut niin a puh thung.

India ramah hian Rohingya mi 40,000 vel an cheng mek a, heng zinga mi 16,000 te chu UN refugee agency-ah an inziaklut a ni.