State panga-a inthlan neih hun tur tichiang ta

Election Commission Commissioner Om Prakash Rawat chuan kar kalta Inrinni khan state panga - Chhatisgarh, Madhya Pradesh, Mizoram, Rajasthan leh Telangana state assembly inthlan neih hun tur a puang. State panga-ah hian November leh December thla inkarah inthlan hi neih a ni dawn a, December 11 ah inthlan result puan a ni ang.

Moaist hel hluarna, Chhattisgarh-ah chuan inthlan hi thawh hniha neih a ni ang a, state dangah chuan thawh khatah zawh fel vek a ni ang.

Chhatisgarh-ah chuan November 12-ah seat 18 awmna, South Chhattisgarh-ah vote thlak a ni ang a, November 20-ah seat 72 awmna North Chhattisgarh-ah vote thlak a ni thung ang. Seat 230 awmna Madhya Pradesh leh seat 40 awmna Mizoram-ah November 28-ah inthlan hi neih a ni dawn a, seat 200 awmna Rajasthan leh seat 119 awmna Telangana state-te chuan December-7 ah vote an thlak ang.

State panga zingah hian Rajasthan, Madhya Pradesh leh Chhattisgarh-ah BJP an sorkar mek a, Telangana state hi chu Chief Minister leh TRS hotu K Chandrasekhar Rao chuan an term tawp hma thla kua la awmah September thla khan assembly a lo ṭhiat tawh a ni. Mizoramah hian BJP sorkar a la ding ngai lo thung.

Assembly inthlan neihna tur state panga-te hian Lok Sabha-ah member 83 an nei a, hei vang hian he inthlan tur hian nakkuma Lok Sabha inthlanpui neih turah pawh nghawng a nei lian tham hle dawn a ni.

Election Commission chuan state panga-ah hian model code of conduct hmanṭan nghal a nih thu a sawi. Inthlan campaign neihnaah boruak muanawm tichhe zawnga chet leh, bengchheng lutuk siamte a khap. Zan dar 10 leh zing dar 6 inkarah mipui tana ninawm thei tur, public address system emaw loudspeaker emaw sound amplifier te hman khap a ni tih a sawi.

Union Home ministry chuan Chhattisgarh, Madhya Pradesh leh Rajasthan-a election duty tura sipai 25,000 tirhna tur thupek a tichhuak nghal bawk. Heng sipaite hi an duty-na tur state October 15-a thleng hman tura tih an ni.

EC hian Inrinni-a inthlan neih hun tur puanga press conference a koh chu chawpchilh takin chhun dar 12.30 aṭangin chawhnu dar 3-ah a sawn a, hei hi eptu lam chuan an sawisel. EC hian Prime Minsiter Narendra Modi-an Rajasthan-a chawhnu dar 1-a political rally a neih tur chu a kaltlangpui theihna turin press conference neih hun pawh hi an sawn phah niin an puh.

Inthlan neihna tur state te :
Chattisgarh : Kum 2013 inthlanah khan BJP hian vote tla aṭanga 41.04% hmuin, Congress-in 40.29% a hmu a, Assembly member 90 awmnaah BJP hian seat 49 lain, Congress hian seat 39 a la.

Madhya Pradesh : Assembly inthlan hnuhnung berah BJP chuan seat 240-ah seat 165 lain, vote tla aṭanga 45% dawn a hmu pha. Congress chuan seat 58 neiin, vote 36.38% a hmu a ni. BJP CM term thum chelh thei, Shivraj Singh Chauhan chuan Hindutva chawilarin Hindu vote a hui nasa hle a, sorkarna an siam hnuah pawh bawng humhalhtu tur ministry hran a siam hial a ni.

Rajasthan : Kum 2013-ah BJP chu hneh taka thlan tlin niin, seat 200 awmah seat 163 a la pha a, Congress in seat 21 chiah a chang a ni. Mahse kumin by-poll neihah Congress hian BJP a hneh thung a, hei vang hian beiseina an nei sang hle.

Mizoram : Congress sorkarna state-ah hian kum 2013 inthlanah khan Congress-in seat 40 awmnaah seat 34 a la a, a vote hmuh zat hi 44.6% a tling. Mizo National Front chuan seat nga a nei.

Telangana : Kum 2014-a assembly inthlanah Telangana Rashtra Samithi chuan seat 119 awmah seat 63 a la a, Congress in seat 21 leh BJP in seat nga an nei.