EC-in candidate-te criminal record tichhuak turin ti dawn

Election Commission (EC) chuan Supreme Court-in inthlan neihna state panga-a candidate-te an criminal record neihte puangzar tura a ngenna chu a taka kaltlangpui a tum.

Chief Election Commissioner OP Rawat chuan, "Supreme Court thupek ang hian Law Ministry hnenah pawh affidavit form chu thlak danglam turin kan ngen a ni", a ti. Form tihdanglam hi hman nghal tura tih a nih thu sawiin, candidate te bakah an awmna party-te chuan print media leh electronic media-ah criminal record an neih chu vawi thum an tihchhuah a ngai dawn a ni, a ti.

Supreme Court chuan inthlana chuh tum candidate-te chuan nominition paper an thehluh hnuah, print leh electronic media-ah criminal record an neih mekte chu an tichhuak tur a ni a lo ti tawh a, heihi mipuiten an aiawha an thlan turte nihna dik tak an hriatchian theihna tur a ni, tiin a sawi. Tuna format hman mekah hian candidate-te returning officer hnenah an criminal record leh thil neih zatte an thehlut a, hei hi commission chuan online-a en theih turin a dah a ni.