Kum 2020-21 chhungin PM CARES Fund-ah Rs vbc 10,990 a lut

India ramin Covid-19 hripui leng dona tur, khuahkhirhna leh harsatna tawkte ṭanpuina atan leh hmalam huna hrileng tuarte ṭanpuina tura duan, Prime Minister's Citizen Assistance and Relief in Emergency Situations Fund (PM CARES Fund)-ah kum 2020-21 inkar chhung khan cheng vaibelchhe 10,990 a lut a, a kum hmasa aiin sum lut hi a let thum dawnin a tam. Sum lut aṭang hian cheng vaibelchhe 3,976 hman ral a ni tawh.

PM CARES Fund audit statement hnuhnung bera a lan danin, he fund aṭanga sum semchhuah zinga Rs vbc 1,000 chu hmun danga inhlawhfa, hri leng vanga migrant welfare tan pek a ni a,Rs vbc 1,392 chu Covid vaccine dose leina atana hman a ni.

Kum 2020-21 chhunga sum hmuh zinga Rs vbc 494.91 chu ram pawn aṭanga lut niin, a bak Rs vbc 7,183 ram chhunga mi hrang hrangte thawhkhawm a ni thung.

PM CARES Fund hi March 27, 2020-a din a nih aṭanga ni nga chhung lekin Rs vbc 3,076.62 a lut hman a, initial corpus chu nuai 2.25 a ni. PM CARES Fund website-a an sawifiahnaah, "mimal/pawl lama tlawmngaite sum tlingkhawm aṭang vekin sum hi hmuh a ni a, budgetary support engmah dawn a ni lo," tiin tarlan a ni.

Sorkar laipui chuan ṭanpuina sum rawn lutte hi Covid-19 dona kawng atan pawimawh - medical equipment, ventilator bakah hmun danga inhlawhfate chhawmdawlna atan a hmang a ni.

Hetih lai hian eptu party-te chuan PM CARES fund chu sawiselin, an sum hmuh leh hmanral dan chu langtlang taka kalpui loah an puh a, hei hi sorkar chuan a pha thung.

Audited statement thar ber tarlan danin, India rama sorkar damdawi-ina hman tura ventilator siamchhuah nan Rs vbc 1,311 hman a ni tawh a, Rs vbc 20.4 chu Covid vaccine laboratory siamna hmun tihchangtlunna atana hman a ni bawk.

Hmun danga inhlawhfa, hri leng vanga hna thawk thei loa mahni in lama hawte ṭanpuina turin state leh Union territory kutah Rs vbc 1,000 pek a ni a, Rs vbc 1,392.82 chu Covid vaccine dose vbc 6.6 leina atan hman niin, bank charge-ah nuai 1.01 hmanral a ni.

Kum 2021, March 31 closing balance chu Rs vbc 7,013.99 a nia, kum 2020-a closing balance Rs vbc 3,076.62 aiin a let hnih chuangin a tam zawk.

Kum 2020-21 sorkar kum chhung khan PM CARES Fund-ah hian Rs vbc 10,990.17 dawn niin, hetah hian interest income leh NDMA kaltlanga refund of unspent balance chhiar tel a ni. Hemi chhung vek hian Rs vbc 3,976.17 chu hmanral a nih thu Chartered Accountants SARC and associates buatsaih audited statement-ah tarlan a ni.

PM Modi-a'n Covid-19 hripui len hnua PM CARES Fund din a nih thu a puan hnu lawk hian private firm, government bodies, mimal leh celebrity-te chu sum thawh tura sawm niin, ngaihven pawh a hlawh nghal hle.

Pawisa thawhkhawmte hi public health emergency, emergency dang, mihring siamchawp emaw khuarel chhiatna, healthcare, pharmaceutical facility siam belh emaw thawmṭhat leh hmasawnna ruhrel pawimawh dangte, research ṭanpuina leh heng kawnga zirchianna pawimawh dangte ṭanpuina atan hman a nih thu website chuan a tarlang bawk.

Prime Minister chu PM CARES Fund-ah hian ex-officio chairman a ni nghal a,defence, home affairs leh Finance minister-te chu ex-officio trustee an ni. Fund chairperson hian trustee pathumte chu board of trustees-ah a hlangkai thei a ni. Trustee-te hi research, health, science, social work, law, public administration leh philanthropy lama mi hmingthang leh rintlak tak an ni tur a ni.