Oct 10-ah Rafale deal petition ngaihtuah dawn

Sorkar laipui leh France-in French aerospace company Dassault Aviation siam, twin-engine Medium Multi Role Combat Aircraft (MMRCA) Rafale fighter leina tura inremna an siam chungchanga petition thehluh chu Supreme Court chuan October 10-ah a ngaihtuah dawn.

Chief Justice Ranjan Gogoi leh Justice SK Kaul leh KM Joseph-te awmna bench chuan lawyer Vineet Dhanda petition thehluh hi an ngaihtuah dawn a ni. Petition thehluttu hian Rafale deal siam chungchangah UPA leh NDA sorkar hnuaia siamte chu khaikhin a, a nihna kimchang taka puanzar tura sorkar laipui hriattir turin a ngen a ni. Hei bakah hian Dassault hi Reliance hnena contract a pek chungchang pawh sawichiang turin a phut bawk.

A hmaa petition lo thehlut tawh, advocate ML Sharman-an France nena Rafale deal siam chungchangah thil fel tawk lo a awm nia sawiin stay turin a lo ngen tawh bawk a, Sharma petition pawh hi October 10 hian ngaihtuah a ni ve nghal dawn a ni. Shamra chuan ram pahnih sorkarten Rafale fighter jet 36 leina tura inremna an siam dan chu Constitution-a Article 253 in a pawmpui lo tih sawiin, eirukna lanchhuahna zawk a ni tiin he inremna siam hi sut turin a phut a ni.

Kumin March thla khan Rafale deal chungchang chhui phutna leh, Parliament-a a man dik tak tal puanzar phutin Supreme Court-ah hian Congress hruaitu Tehseen S Poonawalla chuan petition a lo thehlut tawh bak. Poonawalla chuan kum 2016, September 23-a NDA sorkar leh France sorkarin inremna an ziah fel hma khan Defence Procurement Procedure (DPP) kalphung angin union cabinet pawmpuina lak a ni lo, a ti.