Gujarat aṭangin UP leh Bihar mite tlanchhia

Gujarat-ah state pawn lam aṭanga hnathawkten beih an tawh vangin mi tam tak an tlanchhia a, an zinga a tam zawk hi Uttar Pradesh leh Bihar aṭanga kalte an ni.

Kar hmasa khan Gujarat-a Sabarkantha district-ah nausen thla 14 mi chu pawngsual a ni a, pawngsualtuah hian Bihar mi hnathawka awm chu puh niin man a ni tawh a ni. Hei vang hian state pawn lama aṭanga lut, hnathawktute chuan beih an tawk zui a ni.

Director General of Polcie Shivanand Jha chuan tharum thawhna hi district parukah a thleng zui tih sawiin, Mehsana leh Sabarkantha te chu a hluarna a ni tih a sawi. Tharum thawhna thleng vang hian mi 342 man an ni tawh a, thubuai 42 ziahluh a ni tawh bawk.

Nausen pawngsual tawktu hi Thakor hnam a ni a, hei vang hian Thakor hnamte hian Ahmedabad, Mehsana, Gandhinagar, Patan, Sabarkantha, Banaskantha leh Aravali district-ah pawn lam mi hnathawka awmte chu an bei zui ta a ni.

Tharum thawhna thleng vang hian state sorkar chuan Sabarkantha, Aravali leh Mehsana-a industrial unit 100 velah venhim hna thawktu a dah belh a, state reserve police-te pawh duty tir an ni bawk.