Sabarimala chungchanga SC thutlukna khing let

Supreme Court-in Kerala-a Sabarimala temple-a hmeichhia luh khapna dan hlip a, hmeichhe tupawh an luh a phalsakna thupek a tihchhuah chu ngaihtuah ṭha leh tura ngenin petition thehluh a ni.

Petition thehluttu hi National Ayyappa Devotees Association president Shylaja Vijayan-i a ni a, temple-a hmeichhe lut thei tur kum bithliah siam hlip tura ngentute chu Lord Ayyappa zuitute an ni lo, a ti.

Shylaja Vijayan-i chuan Supreme Court thupek hian Ayyappa zuitu mi maktaduai telte fundamental rights a nghawng a ni, a ti. Ramchhunga court sang ber pawh ni se, mipuite aw aiin a lal zawk tur a ni lo tiin a sawi. Nair Service Society pawhin court thutlukna khing letna tur petition hi thehluh an tum bawk.

Hetihlai hian Kerala Chief Minister Pinarayi Vijayan chuan Supreme Court thupek chu state sorkar chuan a takin a kalpui nghal dawn tih a sawi. "Supreme Court thupek kenkawh hi state sorkar mawhphurhna a ni. Sorkar chuan Lord Ayayappa zuitute rindan beih let chu a tum a ni lo a, inbiakna neihpui tur pawhin a inpeih reng a ni", a ti.