Rajasthan-ah Zika virus vei mi 22 awm

Rajasthan health department chuan Jaipur-ah Zika virus vei finfiah mi 22 hmuh an ni tawh tih sawiin, heng mite hian Jaipur hospital-a isolation ward-ah dah an ni tih a sawi.

Jaipur aṭanga Pune-a National Institute of Virology-a sample 22 thawnte chu Zika virus an vei tih finfiah a ni a, he thil thleng vang hian Prime Minister Office chuan Union Health Ministry hnenah report kimchang pe turin a ti nghal. Nimin khan ministry team chuan thil awmdan enfiah turin Jaipur an pan a ni.

Rajasthan-a Zika virus vei hmuhchhuah zinga a hmasa ber chu Jaipur-a Shastri Nagar area ami a ni a, he hmunah hian medical team tirh nghal an ni. Medical taem 17-te chu Shastri Nagar leh a chhevel biala thil awmdan enfiah turin tirh an ni tawh bawk.

Bihar pawhin Jaipur-a Zika virus vei hmuhchhuah zinga pakhat chu Bihar lam mi a nih avangin an state chhunga district 38-ah mipuite fimkhur tura chahin thurawn a tichhuak nghal a ni. Bihar mi, Jaipur-a lehkha zira awm niin August 28 leh September 12 khan an khua hi a tlawh a, hei vang hian a chhungte pawh an dinhmun enfiah tura dah an ni.

Union Health Minister JP Nadda chuan Zika virus hmuh a nih avang hian mipuite chu chiai lo turin a chah a, uluk taka thlithlai reng niin a veite pawh hmuhchhuah vek an ni, a ti. Sorkar laipui chuan hri leng darh zel tur venna hi a kalpui tih a sawi.

Zika virus hi naupai laiten an kai chuan an naupai lai thlenga rualbanlohna a thlen theih avangin ministry pawhin hri hmuhna biala naupai laite dinhmun chu a enfiah sak a, hei bakah han khualzinte pawh Zika virus hmuhna bialte tlawh rih lo turin thurawn a pe bawk.