Pemlutte beitute laka action la turin Gujarat sorkar phut

Bahujan Samaj Party (BSP) hotu Mayawati chuan Gujarat-a state dang aṭanga pem lut, hnathawktute beih an nih vanga mi tam tak tlanchhiat chungchangah political party-te chu inpuhtawn mai lo a, pawikhawihtute laka action la turin Gujarat sorkar a phut.

Gujarat-a hmeichhe nausen thla 14 mi lek pawngsuala puhin Bihar mi pemlut chu man a ni a, he thil thlen vang hian hmun hrang hrangah state dang aṭanga pemlutte chungah tharum thawhna a thleng zui a ni. Tharum thawhna thleng vang hian pem lut tam tak, a bikin Uttar Pradesh leh Bihar mite chu an tlanchhia a ni.

Mayawati chuan North Indian te chu foreigner an ni lo tih sawiin, Gujarat-a BJP sorkar chuan tharum thawhna thlentute chungah na taka action a la lak a ngai a ni, a ti.

Samajwadi Party (SP) hruaitu Ghanshyam Tiwari pawhin Gujarat-a state dang aṭanga pemlutte beih an ni chu a dem thu sawiin, Gujarat sorkar chu an state-a mitinte himna ngaihtuahsak chu a mawhphurhna a ti tiin, pemlutte beih an ni ngawt chu mirethei leh harsa zawkte laka an rilru puthmang dik loh zia lantirna a ni, a ti. Prime Minister Narendra Modi chuan a state, Gujarat-ah Bihar leh Uttar Pradesh mite a venghim thei lo a nih chuan, Uttar Pradesh-ah a tan hmun a awm dawn bik lo tih a sawi.

Congress president Rahul Gandhi pawhin Gujarat-a North India aṭanga pemlutte beih an ni chu a dem thu sawiin, he pawikhawihnaa thlenga mawhphurtuah PM Modi-a kaihhruai sorkar chu a puh. Gandhi chuan Gujarat-a buaina chhuahna bul ber chu retheihna nasa lutuk leh hnathawh nei lo an tam vang nia sawiin, sorkar inrelbawldan system leh economy chu a tlachhe mek nia sawiin, state dang aṭanga pemlutte lo bitum ngawt chu thil dik lo a ni a, a dodal zel dawn tih a sawi bawk.