A duh anga inthuam turin hmeichhiain dikna a nei - Priyanka Gandhi Vadra
Karnataka-a Muslim hmeichhiaten an lu khuhna atana an hman, hijab inthuam chunga college kal khap chuan ram pumah buaipui a hlawh chhoh zel a, politician hrang hrangte pawh an ṭawngchhuak tawh a ni.
Congress general secretary Priyanka Gandhi Vadra chu ṭawng chhuakin, hmeichhia chuan a thawmhnaw inbel tura duh thlang turin dikna a nei a ni tiin, 'bikini, ghoonghat, jeans leh hijab pawh ni se, ram danpuiin dikna chanvo a pe a ni,"a ti. Hmeichhiate tihnawmnah chu tawpsan turin a ngen nghal bawk.
Hijab chungchanga buaina inṭanna hi thla hmasaa Karnataka-a Udupi khuaa Goverment Girls PU aṭangin a ni. Zirlai hmeichhe parukte chu hijab an inbel avangin class-ah luh phalsak an ni lo tih an sawi. Pre-university education board chuan thuchhuah siamin, school thuneituten uniform atana an pawm chauh zirna inah inbel phal a ni a, sakhaw kaihhnawih thila inthuam chu college-a khapa ni tih an sawi. Hei thuchhuah avang hian Udupi khuaa college hrang hrangah lungawi lohna lantirin, khawpui dangah pawh a kangkai tawh a ni.
Women's rights activist, Nobel Prize dawng tawh, Malala Yousafzai pawhin Karnataka state-a Muslim hmeichhe zirlaite an lu khuhna nena class kal khapsak an ni chu sawiselin, he thil hi pawi a tih thu a sawi. India ram thuneitute hnenah Muslim hmeichhiate thliarhranna titawp turin a ngen.
State chhunga college hrang hrangah hijab khap duh lohna lantir a nih zel avangin, Kanataka sorkar chuan nimin aṭang khan ni thum chhung atan state chhunga school leh college-te a khar. Mahse hemi hun chhunga exam neih tura lo ruahman tawhte erawh kaltlangpui a ni ang.
Higher education minister Dr CN Ashwatha Narayana chuan zirna ina hijab, saffron shawl khap a nih chungchanga court-a petition lut chu ngiahtuah fel a nih hma chuan, boruak ṭha zawk a awm theihna turin state sorkar chuan he thupek hi a tichhuak tih a sawi.
Chief minister Basavaraj Bommai pawhin zirlaite chu court thupek ngaichang a, buaina siam lo turin a ngen. Hemi chungchang hi High Court-in a ngaihtuah fel dawn tih a sawi bawk.