Jammu and Kashmir-ah khualzin an pung

Covid-19 hri leng vanga Jammu and Kashmir-a khualzin tam tak an tlakhniam hnuah, industry sector lamin hma a rawn sawn ṭan leh a, khualzin pawh an pung chak chho tawh hle.

Kum 2021 April thla aṭang khan Kashmir Valley tlawhtu, khualzin hi nuai ruk chuang an awm leh tawh. An zinga nuai thum chuang chu tun thlasik chhunga Gulmarg tlawhtute an ni. Gulmarg hi state pawn lam aṭanga kalte chauh ni lo, tualchhung mite pawhin an tlawh nasa hle.

Tun hnaiah Kashmir-ah hian khualzin nitin 3,000 - 4,000 vel lut ang an ni a, an zingah a tam ber hi Kashmir ski resort lar, Gulmarg tlawha kalte an ni.

Hripui leng vangin Kashmir Valley hian tourism season vawi hnih chu khualzin a hloh nasa hman hle. Mahse nikum November thla aṭang khan Gulmarg-a hotel-te chu an khat chho leh reng tawh a, tualchhung mite pawhin hna thawh tur an neih leh phah a ni.