Telangana chungchanga PM thusawi vangin lungawi lo ; TRS-i'n PM Modi lakah privilege motion pu lut
Prime minister Narendra Modi-a'n Parliament-a Telangana state hran siam anih dan chungchanga a thu sawi danah Telangana Rashtra Samiti (TRS) an lungawi lo hle a, Nilaini khan state chhung hmun hrang hrangah PM thusawi duh lohna hi an lantir zui a ni.
TRS hruaitu, minister, MLA leh MLC-te chuan constituency leh district hrang hrangah lungawi lohna lantir hian flag dum tarin bike rally an huaihawt a ni. Prime minister Modi lim leh BJP lim an siamte chu vui liamin, a hnuah an hal zui bawk. Khawpui hrang hrangah kawng peng ṭhuam pawimawhah Modi leh BJP lim hi an hal.
PM Modi hian Thawhlehnia Rajya Sabha-a President address chungchanga motion of thanks neihnaah, Andhra Pradesh aṭanga Telangana state din a nih danah khan Congress chuan thil a ti dik tawk lo tih a sawi. Telangana state siamna tur bill chungchang sawiho loin Congress chuan tifel a, state ṭhendarh a nih dan chu a vaiin a dik tawk lo a, tun thlengin Telegu state pahnihte hian harsatna an la neih zui phah ta zel a ni, a ti.
He a thusawi hi Telangana-a rorellai, TRS chuan na takin an sawisel nghal a, PM Modi chuan Telangana mipuite rilru a ti na hle a, a thusawi hi an hnawl tih an sawi.
State finance minister, T Harish Rao chuan Congress sorkar laia Telangana state dinna tur bill, party 33 ten an pawm, a pawmtu zingah ngei pawh BJP a tel chu democracy kalphung ni lo leh, dik lo a nihna dan sawifiah turin a phut.
Energy minister G Jagadish Reddy chuan PM thusawi dan aṭang chuan BJP chu anti-Telangana a ni tih state mipuite chuan an hrechiang ta tih sawiin, inthlan lo awm turah mipuite chuan BJP chu zirtirna an pe dawn a ni, a ti bawk.
PM lakah privilege motion pu lut
Telangana state din a nih chungchanga a thusawi dan avangin Telangana Rashtra Samiti (TRS) chuan prime minister Narendra Modi lakah privilege motion an pu lut.
TRS Rajya Sabha floor leader K Keshava Rao bakah an party MP Joginapally Santosh Kumar, B Lingaiah Yadav leh KR Suresh Reddy-te chuan nimin khan Rajya Sabha deputy chairman hnenah notice copy an pe a ni.
PM thusawi dan chu thil zahthlak leh mawi lo, House kalphung leh rorel dan ngaihnepna lantirna a ni, a ti.
Congress hruaitu Mallikarjun Kharge chuan TRS MP-ten PM laka privilege motion an pu lut hi a lo thlawp a ni.