JNU zirlaite kawng zawh tum police-te'n dang

Pathianni zana Delhi-a Jawaharlal Nehru University (JNU) campus chhunga mi­sual­te'n pawikhawihna an thlen duh lohna avanga Ningani tlaia JNU zirlaite'n Rashtrapati Bhavan thleng kawng zawh an tum chu police-te'n an lo dang. 

Zirlaite hian an campus chhunga thil thleng avang hian, an Vice-Chancellor Jagadesh Kumar chu bang turin an phut bawk.

Ningani tlaiah hian JNU zirlai 19 chuan hliam an tuar a, faculty member pangain hliam an tuar bawk. Zirlai ṭhenkhat chu Mandir Marg leh Bawana police station-a hren an ni a, nimin lamah khan chhuah an ni leh tawh thung. 

JNU zirlai hruaitu te, teacher union leh Ministry of Human Resource Development (HRD)-te inbiaknain zirlai te a ti lungawi zoh loh avangin kawngzawh hi huaihawt a ni a, JNU Students' Union (JNUSU) president Aishe Ghosh chuan Rashtrapati Bhavan thlenga kawng zawh hi a rawt a ni. 

HRD secretary Amit Khare chuan JNU VC ban ringawt hian tuna lungawi lohna leh harsatna tawh mek hi a tiziaawm ngawt dawn lo tih sawiin, HRD chuan politics ni loin zirna lam chauh an ngaihtuah tih a sawi bawk. 

Zirlai kawng zawhte hian Mandi House aṭanga zawh ṭanin kawng chanve velah police-te hian an lo dang a ni. Rashtrapati Bhavan-ah hian President hmuh an tum a, an lungawi lohna leh an thil phutte chu thlen an tum a ni.