AP-ah cyclone Titli tleh vangin mi pahih thi

Thlipui cyclone Titli chu nimin zing khan Andhra Pradesh leh Odisha chhim lamah a tleh a, thlipui tlehin chhiatna a thlenah Andhra Pradesh-ah mi pahnih an thi a, Odisha tuipui kama chenga mi nuai thum vel chu hmun him lamah sawnchhuah an ni bawk.

Thlipui tleh hian ruah a keng tel bawk a, ruahsur nasat avang leh tuifawn sang tak a thlen palh hlauhthawn avangin disaster management authority chuan mipuite chu tuipui kam leh hmun hniam lamah te awm lo turin a chah.

Andhra Pradesh leh Odisha-ah chuan thlipui tleh leh ruahsur hian flight leh rel service a tihbahlah phah hle a, IndiGo Airlines chuan Bhubaneswar-a lut leh chhuak tur flight panga a cancel a ni. Thli tleh hian thingkungte a chhem tlu nasa hle a, hmun tam takah power supply leh telephone service thlengin a tibuai bawk.

Odisha sorkar chuan tuipui kam district panga aṭangin mi nuai thum chuang chu hmun him lamah a sawnchhuak a, nimin khan school, college leh childcare centre-te pawh a khar tir vek a ni. State sorkar chuan ruahsur nasa avangin tuilian pawh an tuar thut thei tih sawiin, hemi atan hian theihtawpin an lo inbuatsaih lawk tih a sawi.