Covid-19 dose thumna pek chungchang sorkarin a zirchiang phawt dawn

Sorkar laipui chuan Ningani khan puitling zawng zawng hnena Covid-19 vaccine dose thumna pek chungchang chu zirchianna mumal tak neih hmasak a ni phawt dawn tih a sawi.

NITI Aayog Member (Health) Dr V K Paul chuan weekly press conference a neihah hemi chungchang hi sawiin, precaution dose chungchanga thutluknate chu ngaihtuah hmasak a, chumi hnu chuan an mamawh dan a zir zela pekchhuah chauh a nih thu an sawi a ni. "Science thiamnate hi min khalh kaltu a ni, chumi zawh chuan programmatic leh epidemiological-ten an dawt. Midangin an duhzawngin an kalpui a, ngaih pawimawh an nei ang bawkin, keini pawhin tihdan phung kan nei a, heng zawng zawng hi science hmangin chik taka enfiah mek a ni," a ti.

Vaccine pek belh aṭul dan leh mipui nawlpuite telh an ngai em tih chungchang hi ngunthluk takin zirchian mek a ni tiin, thutlukna siam a nih hunah puanzar nghal a ni ang, tiin Dr Pual chuan a sawi.

Health Ministry joint secretary Lav Agarwal chuan vaccine pek chhuah mekah kum bithliah hrang hrangah a in ang lo hle tih a sawi a, hemi rual hian a tlangpui thuin ramchhunga vaccine semchhuah dan chu a la ṭha tawk hle tih a sawi. "Nikum October thla khan, chawhrualin nitin dose nuai 77.55 semchhuah ziah a ni. November khan nitin dose nuai 59.32 an semchhuak a. December-ah nuai 61.91 leh kumin January khan nuai 69.49 niin, tun ni kua liamta chhung khan chawhrualin nitin dose nuai 51 vel pek ziah a ni. Mahse dose khatna la tawh 96% leh dose hnihna la tawh 78% an awm avangin, ram mipui vaccine lak ngai hi a tlem ve tial tial a ni," a ti. Tleirawl, vaccine la la lo te hnenah zirtirna pek a pawimawh zia a sawi nghal bawk.

Hrileng thawh thumna chhunga hri kai nawn lehte chungchangah, ICMR director general Dr Balram Bhargava chuan variant pakhat kaiin variant dang lakah a veng thei lo a, variant thar lo chhuak thar zel vangin hri kai nawn hi an awm leh ṭhin a ni, a ti. "Mahse vaccine lak hian natna khirh tak leh damdawi-in panpui ngai leh thihna lakah min veng thei a, Covid appropriate behaviour hi hri danchah nan a ṭangkai takzet. Hri hnathawh dan hi mitinah a thawh dan a inang lo hle a ni," a ti.