Karnataka HC-in zirna inah hijab, saffron shawl leh Sakhaw lam kaihhhnawih thuam inbel a khap

Karnataka High Court chuan state chhunga college ṭhenkhatin Muslim hmeichhiate lukhuhna, hijab inbel an khap chungchanga petition lutte a ngaihtuah hnuah interim order a tichhuak a, zirlaite chu zirna inah hijab, saffron shawl leh sakhaw lam kaihhnawih thuam inbel lo turin a ti. He thupek hi college ṭhenkhat, uniform/dress code siamte tana tih a ni.

Chief justice Ritu Raj Awathi kaihhruai High Court bench chuan, state sorkar leh stakeholder dangte pawh zirna inte hawng a, zirlaite chu a hma thei ang bera class kal chhunzawm tir turin a ngen bawk. Thupek dang tihchhuah a nih leh hma chuan zirlaite chuan eng sakhaw mi pawh ni se, an sakhaw kaihhnawih thuam - saffron shawl, scarf, hijab-te bakah sakhaw flag leh a dangte pawh classroom chhungah inbel lo turin a ti.

Hijab chungchang avanga state chhunga zirna inte khar a ni leh, tun thlenga nawr buaina la awm chu pawi a tih thu court chuan a sawi bawk.

High Court thupek hi zirlai ṭhenkhat chuan Supreme Court-ah an khing nghal a, mahse Supreme Court chuan an petition thehluh hi nimin khan ngaihtuah nghalin a hnawlsak a, he thilah hian a ṭul hun nia an ngaihah chuan Supreme Court chu a inrawlh dawn tih a sawi.