Internet hman hi fundamental right a ni: SC

Supreme Court chuan nimin khan Jammu and Kashmir thuneitute chu internet hman khapa tihtawp chungchang chu ennawn tura hriattirin, internet hman chu fundamental right, constitution-in a venhim tlat a nih thu a puang.

Supreme Court hian nimin khan a ṭum khatna atan internet hman theihna chu consti­tution Article 19 (1) (a) of the Constitution (the right to freedom of speech and expression) leh Article 19 (1) (g) (the right to practise any profession, trade or occupation) peng pakhatah a tel tih a puang a ni.

Tiam chin awm loa internet tihtawp chu dan kalh a ni tih sawi mah se J&K-a thla nga chhung tehmeuh internet tihtawp chu dan kalh a nih thu a puang lo thung. Code of Criminal Pro­­cedure, 1973 hnuaia Sec­­tion 144 puan chung­chang­ah pawh SC chuan thupek tichhuakin hetianga inkhuahkhirhna dan hi mipuite'n an ngaihdan an sawichhuah theih lohna hmanruaa hman tur a nih loh thu a tarlang bawk.