Mithiamte'n rawtna an thlen hunah Naupang kum 5-15 tan Covid vaccine pek a ni ang : Mandaviya

Sorkar laipui chuan mithiamte hnen aṭanga rawtna an hmuh veleh naupang kum 5 aṭanga 15 inkar tan Covid-19 vaccine a sem chhuak dawn tih union health minister Mansukh Mandaviya chuan a sawi.

Health Minister Mandaviya chuan naupang kum 15 hnuai lamte vaccine pek rawt chungchang hi tun thlengin sorkar lamah thlen a la awm lo tih a sawi. "Vaccine lak hun tur leh eng kum chin nge pek tur tih chu scientist rualte thutluknaah a innghat dawn a ni. Precaution dose pek chungchang pawh rawtna an thlen aṭanga kar khat chhungin kalpui nghal a ni. Kum 5-15 inkarte pek ṭul nia an hriat an rawt hunah kan kalpui leh nghal dawn a ni," tiin Inrinni liam ta BJP programme siama thu a sawiah a sawilang a ni.

"Vaccine chungchangah buaina kan nei lo. Vaccine kan ngah tawk a, dose indaih lohna a awm hek lo. Scientific community-te thurawn angin kan kal dawn a ni," a ti. "Scientist-te hian rawtna an thlen hmain an zirchiang phawt ṭhin a ni. Vaccine pek chungchang hi a hma chuan khawvel ngaihdan kan ṭawmpui mai ṭhin a, mahse tunah chuan kan scientist-ten anmahni ngeiin an zirchiang a, chumi hmang chuan ngaihdan kan lo siamfel thei tawh a ni," a ti.

Ramchhunga vaccine semchhuah hna kalpui mekah, tleirawl kum 15-18 inkar zinga 75% te chuan Covid vaccine dose khatna an la tawh a, puitling zinga dose khatna la chu 96% niin, India mi 77% te chuan vaccine dose bikimin an la tawh bawk tih Mandaviya chuan a sawi. India rama vaccine semchhuah dan chu a ṭha tawk hle tih sawiin, Union minister chuan hri leng dona kawngah ṭangkai takin vaccine chu hman a nih thu a sawi.