EC-in campaign theih hun pawhsei sak, mipui punkhawmna huaihawt phalsak

Election Commission of India chuan kar liam ta Inrinni khan assembly inthlan neihna tur state pangaah inthlan campaign chungchanga khuahkhirhna a siamte a thlahdul.

Poll body chuan bithliah chin awmin mipui punkawmna, padyatras buatsaih a phalsak a, campaign theih hun pawh zing dar 6 aṭanga zan dar 10 thleng a pawhsei sak. A hma chuan zing dar 8 leh zan dar 8 inkarah chauh campaign hi a phalsak a ni.

Thuchhuah a siamah ECI chuan, "Political party/candidate-te chu an hmun ruata lengzat aṭanga 50% aia tam lo emaw, SDMA-in tel thei chin a bithliah ang china an campaign phal a ni a, Pad Yatra pawh SDMA-in mipui kal thei zat a bithliah anga neih phalsak an ni," a ti.

Ram chhunga coronavirus hri kai pung thar leh avangin ECI hian a hmain state pangaah hian physical rally, roadshow leh padyatra-te neih a lo khap tawh a ni. Mahse hri leng dinhmun thlirin khuahkhirhna siamte hi a ennawn a, hri kai thar an tlakhniam chhoh zel avangin dan siamte pawh a thlahdul chho ve zel a ni.

UP-a assembly seat 403, Punjab-a seat 117, Uttarakhand-a seat 70, Manipur-a seat 60 leh Goa seat 40-ah February 10-March 7 inkarah inthlan hi thawhsariha neih tur a ni. Vote tlate hi March 10-ah chhiarin result puan a ni ang.